नाशिक जिल्हा काल रात्री १० वाजताच्या सुमारास भूकंपाने हादरला. या भूकंपाची तीव्रता ४.३ रिश्टर स्केल इतकी होती. या भूकंपानंतर आता पुन्हा भूकंपाचा धक्का जाणवण्याची शक्यता व्यक्त करण्यात आली आहे. राष्ट्रीय भूकंप विज्ञान केंद्राकडून आणखी एका धक्क्याची शक्यता व्यक्त करण्यात आल्याने नाशिक जिल्हा प्रशासनाने नागरिकांना सतर्क राहण्याचे आवाहन केले आहे.

काल रात्री जाणवलेल्या भूकंपाचा केंद्रबिंदू गुजरात सीमेवरील हातगड डोंगररांगांमधील भनवड परिसरात असल्याची नोंद करण्यात आली आहे. जमिनीखाली सुमारे ५ किलोमीटर खोलीवर भूकंपाचे केंद्र असल्याचे प्रशासनाकडून सांगण्यात आले. या धक्क्याचा परिणाम नाशिक जिल्ह्यासह दिंडोरी तालुक्यातील काही भागांत जाणवला.

भूकंपानंतर जिल्ह्यातील महत्त्वाच्या धरणांची प्रशासन आणि पाटबंधारे विभागाकडून पाहणी करण्यात आली. करंजवण, पालखेड, ओझरखेड, वाघाड, तिसगाव आणि पुणेगाव या सर्व धरणांची तपासणी पूर्ण झाली असून, सध्या कोणतीही हानी झालेली नसल्याचे प्रशासनाने स्पष्ट केले आहे. भूकंपाच्या केंद्रबिंदूपासून करंजवण धरण २२ किलोमीटर, ओझरखेड ३४ किलोमीटर, तर वाघाड धरण ३५ किलोमीटर अंतरावर आहे.

पाटबंधारे विभागातील सर्व अभियंत्यांना धरणांवर पूर्णवेळ आणि बारकाईने निगराणी ठेवण्याचे निर्देश देण्यात आले आहेत. दरम्यान, पुन्हा भूकंपाचे धक्के जाणवल्यास नागरिकांनी घाबरून न जाता तातडीने मोकळ्या जागेत जावे आणि सुरक्षित राहावे, असे आवाहन करण्यात आले आहे. नागरिकांनी केवळ प्रशासनाकडून दिलेल्या अधिकृत माहितीकडेच विश्वास ठेवावा, असे प्रशासनाने स्पष्ट केले आहे.