तबरेज शेख, ता. २७ मे २०२४

शर्यत पाहण्यासाठी गेलेल्या तरुणाचा टांगा अंगावरुन गेल्याने मृत्यू झाल्याची धक्कादायक घटना समोर आली आहे. पोपट कचरु मुंजे ( वय ५२) असे मृत व्यक्तीचे नाव असून नाशिकमध्ये घडलेल्या या घटनेने सर्वत्र हळहळ व्यक्त होत आहे. तसेच याप्रकरणी आयोजकांवर गुन्हा दाखल करण्यात आला आहे.

याबाबत सविस्तर माहिती अशी की, नाशिकच्या इगतपुरी तालुक्यातील मुंढेगाव येथे टांगा शर्यतीचे आयोजन करण्यात आले होते. ही शर्यत पाहण्यासाठी पोपट कचरु मुंजे (रा सारुळ, ता. नाशिक) आले होते. यावेळी बाजूला उभे राहून शर्यत पाहत असतांना भरधाव टांगा अचानक त्यांच्या अंगावर आला. या दुर्घटनेत त्यांच्या डोक्यावर व उजव्या कानावर जबर मार लागून ते गंभीर जखमी झाले.

दुर्घटनेनंतर त्यांना उपचारासाठी रुग्णालयात उपचारासाठी दाखल केले, मात्र तोपर्यंत त्यांचा मुत्यू झाला होता. यावेळी शर्यतस्थळावरील ग्रामीण पोलीस काय करत होते? असा सवाल शर्यत शौकिनांमधून उपस्थित केला जात आहे. याप्रकरणी आयोजक, गावच्या सरपंचासह 10 ते 12 जणांवर सदोष मनुष्यवधाचा गुन्हा दाखल केला आहे.

दरम्यान, या दुर्घटनेत मृत्यू झालेले पोपट कचरु मुंजे हे टांगा शर्यतीचे शौकिन होते. तसेच सारूळ परिसरात सामाजिक कार्यात ते नेहमीच अग्रेसर असायचे. टांगा शर्यत शौकिनाचा शर्यतीमध्येच मृत्यू झाल्याने सर्वत्र हळहळ व्यक्त होत आहे.