नंदुरबार : नवापूर शहरात गेल्या चार-पाच दिवसांपासून एका पिसाळलेल्या घोडीचा थैमान सुरू होता. नागरिकांना त्या घोडीने चावा घेतल्याचा दावा परिसरातील नागरिकांनी सोशल मीडियावर केला होता. नगरपालिकेने यावर उपाययोजना करावी अशी मागणी करण्यात आली होती.

हे देखील पहा :

नवापूर शहरातील जनता पार्क, मंगलदास पार्क,शांती नगर, आदर्श नगर, लाखानी पार्क, रंगेश्वर पार्क, प्रभाकर कॉलनी नवापूर शहरातील विविध भागांतील चार ते पाच नागरिकांना चावा घेतला आहे. त्याची दखल घेत नगराध्यक्ष हेमलता पाटील यांच्या सूचनेनुसार माजी उपनगराध्यक्ष फारुख शहा, यांनी तात्काळ त्या घोडीला पकडण्यासाठी टिम तयार करून दोरीच्या सहाय्याने शोएब काकर,आसीफ कलीम शहा, नसरुद्दीन बाबू शहा, या युवकांनी रंगेश्वर पार्क जवळ या घोडीला पकडले.

घोडीला जेरबंद केल्यानंतर पाय बांधून पशुवैद्यकीय अधिकार्‍यांकडे उपचारासाठी पाठवण्यात आले आहे. त्यामुळे नवापूर शहरात पुन्हा मोकाट गुरांचा व कुत्र्यांचा प्रश्न ऐरणीवर आला आहे. यावर पालिकेने वेळीच उपाय योजना करावी अशी मागणी होत आहे.

Edited By : Krushnarav Sathe