सागर निकवाडे 

नंदुरबार : शालेय मुलांना पोषण आहारात आता मिलेटबार चॉकलेट देखील खाऊच्या स्वरूपात दिल्या जातात. मात्र या चॉकलेट उघड्यावर फेकून दिल्याचा धक्कादायक प्रकार नंदुरबार जिल्ह्यातील शहादा तालुक्यातील म्हसावद ते पाडळदा गावाच्या रस्त्यावर आढळून आला आहे. या प्रकारामुळे शिक्षण विभागाचा भोंगळ कारभार पुन्हा एकदा समोर आला आहे. 

शहादा (Shahada) तालुक्यातील म्हसावद ते पाडळदा गावाच्या रस्त्यावर एका घराशेजारी शिक्षण विभागाकडून शाळेतील विद्यार्थ्यांना शालेय पोषण आहारात देण्यात येणाऱ्या मिलेट बार चॉकलेट फेकलेल्या अवस्थेत आढळून आले आहे. या शालेय पोषण आहारात देण्यात येणाऱ्या मिलेट्स बार चॉकलेट्स परिसरातीलच कुठल्यातरी शाळेतील विद्यार्थ्यांना पुरवठा करण्यात आला होता. परंतु सदर चॉकलेट्स रस्त्यावर फेकलेल्या अवस्थेत आढळल्याने (Education Department) शिक्षण विभागाचा भोंगळ कारभार समोर आला आहे.  

एकीकडे नंदुरबार जिल्ह्यात कुपोषित बालकांचे प्रमाण अधिक आहे. हे कुपोषण कमी करण्यासाठी शासनाकडून विविध उपाय योजना राबविल्या जात आहे. याच अनुषंगाने पोषण आहारात मिलेट बार चॉकलेट देण्यात आल्या आहेत. मात्र शालेय (Poshan Aahar) पोषण आहारात देण्यात येणारे मिलेट्स बार चॉकलेट्स रस्त्यावर फेकले जात असल्याची घटना नंदुरबार जिल्ह्यातील शहादा तालुक्यातील म्हसावद पाडळदा रस्त्यावर समोर आले आहे. या प्रकरणाचा चौकशी करण्याची मागणी होत आहे.