Summary -

• नंदुरबारमध्ये राजकीय वातावरण तापले

• माजी आमदार शिरीष चौधरी यांच्या घरावर दगडफेक

• कार जाळण्याचा प्रयत्न आणि घराच्या काचा फोडल्या

• ३० हून अधिक जणांविरोधात गुन्हा दाखल

नंदुरबारमध्ये राजकीय वातावरण तापले आहे. नंदुरबारमध्ये शिंदेंच्या शिसेनेचे माजी आमदार शिरीष चौधरी यांच्या घरावर अज्ञातांनी हल्ला केला. घरावर झालेल्या दगडफेकीत खिडक्यांचे काचा फुटल्या. तसंच माजी आमदाराची कार जाळण्याचा प्रयत्न करण्यात आला. या घटनेनंतर शिरीष चौधरी यांच्या घराजवळ पोलिसांचा मोठा फौजफाटा तैनात करण्यात आला. या प्रकरणी रात्री उशिरापर्यंत ३० पेक्षा अधिक जणांविरोधात गुन्हा दाखल करण्यात आला.

नंदुरबार नगर परिषदेवर माजी आमदार शिरीष चौधरी यांचे सुपुत्र प्रथमेश चौधरी यांची उपाध्यक्षपदी निवड झाली. नगर परिषदेमध्ये शनिवारी उपनगराध्यक्ष पदासाठी विशेष सभा घेण्यात आली होती. या मतदान प्रक्रियेत प्रथमेश चौधरी यांनी ३० मतांनी विजय मिळवला. प्रथमेश चौधरी यांच्या निवडीनंतर दुपारच्या सुमारास झालेल्या किरकोळ वादानंतर रात्रीच्या वेळेस अज्ञातांनी शिरीष चौधरी यांच्या घरावर दगडफेक केली.

नंदुरबार नगर परिषदेची निवडणूक काही दिवसांपूर्वी पार पडली. या निवडणुकीत शिंदेंच्या शिवसेनेच्या ५ पैकी ४ मुस्लिम उमेदवारांचा पराभव झाला होता. या चारही जागांवर एमआयएम पक्षाच्या उमेदवारांचा विजय झाला होता. मात्र शिंदेंच्या शिवसेनेकडून ३ स्वीकृत नगरसेवकांना संधी मिळाली. यांच्यात मुस्लिम चेहरा म्हणून माजी उपनगराध्यक्ष हाजी परवेज खान यांना संधी देण्यात आली. हाजी परवेज खान हे शिंदेंच्या शिवसेनेकडून मुस्लिम समाजातील प्रमुख चेहरा आहेत. मुस्लिम समाजाला न्याय देण्यासाठी परवेज खान यांना संधी देण्यात आल्याची चर्चा नंदुरबारमध्ये सुरू आहे.