नंदुरबार : नंदुरबार शहराला पाणीपुरवठा करणाऱ्या विरचक धरणात पोहायला गेलेल्या दोन विद्यार्थ्यांचा गाळात बुडून मृत्यू झाला. दोन युवकांचा मृत्यूने त्यांचा कुटुंबीयांनी जिल्हा रूग्णालय (Hospital) परिसरात एकच आक्रोष केला. शेवटचा पेपर त्यांचा आयुष्यासाठी अखेरचा ठरला. (nandurbar news Two students die while swimming in dam)

यशवंतराव चव्हाण मुक्त विद्यापीठाची परिक्षा सुरू आहे. गुरूवारी (७ जुलै) शेवटचा पेपर होता. तो संपल्यानंतर पथराई (ता.नंदुरबार) येथील कल्पेश भगवान सोनवणे (वय २०) व (Nandurbar) नंदुरबार येथील दीपक सुनील वाकडे (वय २०) हे दोन्ही मित्रांसह ८ जण झराळी येथील विरचक धरणात पोहायला गेले होते. दुपारी साधारण तीन वाजेची वेळ होती. धरणात पाणीसाठा कमी झाला असून मोठ्या प्रमाणावर गाळ साचला आहे.

गाळात पाय रूतला अन्‌ ते बुडाले

पोहण्याचा आनंद घेत असताना कल्पेश व सुनील या दोन्ही विद्यार्थ्यांच्या गाळात पाय रूतले. त्यानंतर ते पूर्णपणे गाळात बुडाले. त्यात त्यांचा दोघांचाही मृत्यू (Death) झाला. ही घटना सोबत असलेल्‍या विद्यार्थ्यांच्‍या लक्षात आली. त्यांनी पोलिसांनी माहिती दिली. पोलिस (Police) व बचाव पथक घटनास्थळी पोहोचले. सायंकाळी पाचला दोघांचे मृतदेह बाहेर काढून जिल्हा रुग्णालयात पाठविण्यात आले. डॉक्टरांनी तपासणीकरून मृत घोषित केले. दीपक हा पोलिस कर्मचाऱ्याचा मुलगा आहे. घटनेची माहिती मिळताच त्यांचा कुटुंबीयांसह नातेवाईक, मित्रांनी जिल्हा रूग्‍णालयात गर्दी केली होती. कुटुंबीयांनी एकच आक्रोश केला. रात्री उशिरापर्यंत नंदुरबार तालुका पोलिस ठाण्यात घटनेची नोंद करण्याचे काम सुरू होते.