सागर निकवाडे 
नंदुरबार : विधानसभा निवडणुकीत बंडाचे प्रमाण वाढले आहे. बहुतांश मतदारसंघात मित्र पक्षातील पदाधिकाऱ्यांकडून बंडखोरी केली जात आहे. नंदुरबार जिल्ह्याच्या अक्कलकुवा मतदारसंघात बंडखोरी झाल्यानंतर आता शहादा तळोदा मतदार संघात काँग्रेसकडून बंडखोरी होत आहे. बाहेरून आलेल्या व्यक्तीला उमेदवारी दिल्याने नाराजी असल्याने अपक्ष उमेदवारी दाखल करण्यात आली आहे. 

विधानसभा निवडणुकीच्या रणसंग्रामात उतरण्यासाठी अनेकजण इच्छुक होते. मात्र महाविकास आघाडी व महायुतीमध्ये तीन पक्ष असल्याने जागा वाटपाचा तिढा निर्माण झाला होता. तरी देखील पक्षश्रेष्ठीनी तिढा सोडवत उमेदवारी जाहीर केली आहे. या जागा वाटपावरून अनेक जागांवर मित्र पक्षात नाराजी उफाळून आली. यामुळे बंडखोरी करत अपक्ष निवडणूक लढविण्यासाठी अर्ज देखील दाखल करण्यात आले आहेत. त्यानुसार शहादा- तळोदा मतदार संघात काँग्रेसचे (Congress) जिल्हा परिषद उपाध्यक्ष सुहास नाईक यांनी अपक्ष उमेदवारीचा अर्ज भरला आहे. 

राजेंद्र गावितांच्या उमेदवारीने नाराजी 
दरम्यान महाविकास आघाडीत (Shahada) शहादा- तळोदा मतदारसंघ काँग्रेसला सुटला होता, यामुळे काँग्रेसकडून राजेंद्र गावित यांना उमेदवारी देण्यात आली होती. मात्र भाजपमधून काँग्रेसमध्ये आलेले राजेंद्र गावित यांना उमेदवारी मिळाल्याने सुहास नाईक नाराज झाले होते. यामुळे सुहास नाईक हे अपक्ष उमेदवारी करण्यास तयार आहेत. तीन वाजेपर्यंत पक्षाच्या एबी फॉर्म मिळणार असल्याची अपेक्षा नाईक याना असून एबी फॉर्म न मिळाल्यास करणार अपक्ष उमेदवारी करणार असल्याचे नाईक यांनी स्पष्ट केले आहे. तर काँग्रेस उमेदवार राजेंद्र गावित यांची डोकेदुखी वाढणार आहे.