सागर निकवाडे 
नंदुरबार : नंदुरबार शहरात काल अफवेमुळे दगडफेक होऊन दंगल उफाळून आली होती. नंदुरबार शहरात झालेल्या दंगलीनंतर तणावपूर्ण शांतता आहे. दंगल करणाऱ्या आरोपींवर नंदुरबार शहर पोलीस ठाण्यात गुन्हा दाखल करण्यात आला असून दगडफेक करणाऱ्या चाळीस जणांना पोलिसांनी ताब्यात घेतले आहे. 

नंदुरबार (Nandurbar News) शहरात दोन गटात दगडफेकीची घटना घडली होती. त्यामुळे माळीवाडा परिसरातील नागरिकांचे मोठे नुकसान झाले असल्याची प्राथमिक माहिती मिळाली आहे. ईद- ए- मिलादच्या जल्लोष मिरवणूक दरम्यान हा सर्व प्रकार घडला होता. त्यामुळे परिसरात तणाव पाहायला मिळत आहे. पोलिसांकडून या सर्व परिस्थितीवर नियंत्रण मिळवण्यात आले असून, यासाठी जिल्हा पोलीस (Police) दलासोबतच राज्य राखीव दलातील दाखल झाले आहेत. माळीवाडा, इलाई चौक परिसरामध्ये आज देखील तणावपूर्ण शांतता पसरली आहे.  

शहरात घडलेल्या दंगलीच्या प्रकारानंतर पोलिसांकडून गुन्हा दाखल करण्यात आला असून दगडफेक करण्यात आरोपींना पकडण्याची प्रक्रिया सुरू आहे. यात आतापर्यंत ४० जणांना पोलिसांनी ताब्यात घेतले आहे. तर दंगल करणाऱ्या आरोपींवर कठोर कारवाई केली जाणार असल्याचे संकेत पोलिस दलाकडून देण्यात आलेले आहेत.