तळोदा (नंदुरबार) : तळोदा बाजार समितीमध्ये शिपाई म्हणून कार्यरत असलेल्या इसमाचा विजेचा धक्का लागून मृत्यू झाल्याची घटना बाजार समितीच्या आवारात घडली. कृषी उत्पन्न बाजार समितीच्या आवारातील गोडाऊनच्या छतावर चढून सफाई करीत असताना हि घटना घडली आहे. 

नितेश जयसिंग धानका (वय ४०) असे मृत इसमाचे नाव आहे. सदरची घटना २८ सप्टेंबरला दुपारच्या सुमारास घडली. नितेश धानका हा (taloda) तळोदा कृषी उत्पन्न बाजार समितीत शिपाई या पदावर कार्यरत होता. शनिवारी गोडाऊनच्या छतावर सफाई करत असताना त्याचा विजेच्या तारांना संपर्क झाला. यामुळे विजेचा जोरदार झटका बसून, तो खाली कोसळला. सदर घटनेनंतर बाजार समितीतील (Bajar Samiti) कर्मचाऱ्यांनी त्यास तातडीने उपजिल्हा रुग्णालयात दाखल केले. 

नितेश याचा ज्या तारेला स्पर्श झाला ती तार ११ केव्ही वीज प्रवाहाची असल्याने जबर धक्का बसल्याने त्याचा मृत्यू झाल्याचे वैद्यकीय अधिकाऱ्यांनी सांगितले. घटनेची माहिती मिळाल्यानंतर नातेवाईकांनी एकच टाहो फोडला. आमदार राजेश पाडवी घटनास्थळी दाखल झाले. तसेच, तळोद्याचे प्रभारी सहाय्यक पोलिस निरीक्षक राजू लोखंडे व कर्मचारी दाखल झाले.