सागर निकवाडे 

नंदुरबार : राष्ट्रवादीच्या उमेदवारासाठी राज्याचे उपमुख्यमंत्री अजित पवार यांची जाहीर सभा झाली, मात्र त्यांच्या सभेत दोन ते अडीच हजार लोक असणं हे दुर्दैव आहे. या सभेमुळे व केवळ अडीच हजार लोक असणे, म्हणजे त्यांच्या उमेदवाराची काय परिस्थिती आहे ही समोर आली आहे; अशा शब्दात नवापूरचे अपक्ष उमेदवार शरद गावित यांनी टीका केली आहे. 

नंदुरबार जिल्ह्यातील नवापूर (Navapur) विधानसभा मतदारसंघात तिरंगी लढत पाहायला मिळत असून अपक्ष उमेदवाराचे देखील येथे आव्हान आहे. अपक्ष उमेदवार शरद गावित यांच्याकडून ग्रामीण भागात जोरदार प्रचार सुरू आहे. दरम्यान महायुतीच्या (NCP) राष्ट्रवादी काँग्रेसच्या उमेदवारासाठी अजित पवार यांची सभा पार पडली आहे. यावर शरद गावित यांनी निशाणा साधला आहे.  

तिकीट मिळविण्यासाठी त्यांना महिनाभर फिरावे लागले 

काँग्रेसचे उमेदवार शिरीष नाईक हे महिनाभरापासून नाना पटोलेंच्या मागे फिरत होते. त्यानंतर त्यांना तिकीट मिळाले आहे. त्याच पद्धतीने भरत गावित हे देखील अजित पवारांच्या मागे फिरत होते. तेव्हा उमेदवारी त्यांना मिळाली आहे. मात्र मी कुठल्याही पक्षाकडे तिकीट मागायला गेलो नाही. नवापूर विधानसभेतील जनता माझ्यासोबत आहे. मला कुठल्याही पक्षाची किंवा चिन्हाची गरज नाही. यामुळे माझ्या विजय निश्चित आहे; असे विश्वास अपक्ष उमेदवार शरद गावित यांनी व्यक्त केले आहे.