सागर निकवाडे, नंदुरबार|ता. २९ जुलै २०२४

नंदुरबारमधून एक मोठी दुर्घटना समोर आली आहे. नंदुरबारमध्ये वर्षा सहलीसाठी आलेल्या पर्यटकांची कार दरीत कोसळल्याची घटना घडली. नंदुरबार जिल्ह्यातील अक्कलकुवा तालुक्यात ही घटना घडली असून सुदैवाना यामध्ये कोणालाही दुखापत झाली नाही. या घटनेचा व्हिडिओ सध्या सोशल मीडियावर व्हायरल होत आहे.

राज्यभरात मुसळधार पाऊस कोसळत असून धरणे, धबधबे भरुन वाहत आहेत. त्यामुळे याठिकाणी वर्षा सहलीसाठी पर्यटक मोठी गर्दी करताना दिसत आहेत. अनेक पर्यटनस्थळांवर मोठ्या दुर्घटनाही घडल्याचे समोर आले आहे. नंदुरबार जिल्ह्यात वर्षा सहलीसाठी आलेल्या पर्यटकांची कार दरीत कोसळल्याची घटना घडली.

समोर आलेल्या माहितीनुसार, सातपुड्याच्या डोंगर रांगांमध्ये घाट रस्त्यांमध्ये वर्षा पर्यटनासाठी मोठ्या प्रमाणात पर्यटक हजेरी लावत असतात. अक्कलकुवा तालुक्यात असलेले घाट रस्ते ऑफ रोडिंग करणाऱ्या पर्यटकांसाठी आव्हानात्मक असते. त्यासाठी गुजरात, मध्य प्रदेश मधून मोठ्या प्रमाणात पर्यटक या भागात येत असतात. अशातच वळंबा चिखली येथील घाटात एक थार गाडी दरीत कोसळल्याची घटना समोर आली आहे.

या दुर्घटनेत कोणालाही गंभीर दुखापत झाली नाही मात्र थार गाडीचा अक्षरशः चक्काचूर झाला. या दुर्घटनेचा व्हिडिओ सध्या सोशल मीडियावर व्हायरल होत आहे. दरम्यान, हे पर्यटक नेमके कुठले होते? याबाबतची माहिती अद्याप समोर आली नाही. याप्रकरणी अक्कलकुवा पोलीस ठाण्यात नोंद करण्यात आली आहे. अधिक तपास सुरू आहे.