संजय सुर्यवंशी, नांदेड प्रतिनिधी

नांदेडच्या कृषी उत्पन्न बाजार समितीत हळदीने मागील ९ वर्षांतील सर्व विक्रम मोडीत काढत मोठी झेप घेतली आहे. नांदेडच्या बाजारात उच्च प्रतीच्या हळदीला प्रति क्विंटल तब्बल २२ हजार २०० रुपयांचा विक्रमी भाव मिळाला आहे. काल हळदीला २२ हजार २०० रुपयांचा भाव मिळाला होता, तर आजच्या सत्रात प्रति क्विंटल २१ हजार ५०० रुपयांचा भाव नोंदवला गेला. गेल्या ९ वर्षांतील हा सर्वाधिक उच्चांकी भाव मानला जात आहे. यापूर्वी २०१९ मध्ये हळदीला १९ हजारांपर्यंतचा भाव मिळाला होता.

भावात अचानक विक्रमी वाढ होण्यामागचे कारण काय?

यंदाच्या खरीप हंगामात शेतकऱ्यांनी हळद लावली खरी, पण पावसाअभावी आणि तीव्र दुष्काळामुळे हळदीचे पीक अपेक्षेप्रमाणे आले नाही. पुढील काळातही हळदीचे उत्पादन येण्याची शक्यता अत्यंत कमी असल्याने बाजारात हळदीची मागणी प्रचंड वाढली आहे, मात्र त्या तुलनेत आवक खूपच रोडावली आहे. यामुळेच शिल्लक हळदीला सोन्यासारखे भाव मिळत आहेत.

पण, या दरवाढीचा फायदा सर्वांना मिळतोय का?

बाजारभावात विक्रमी वाढ झाली असली, तरी याचा प्रत्यक्ष फायदा मोजक्याच शेतकऱ्यांना मिळणार आहे. कारण बहुतांश शेतकऱ्यांनी गरजेपोटी आपली हळद यापूर्वीच विकली असून, सध्या मोजक्याच शेतकऱ्यांकडे हळद शिल्लक आहे. विशेष म्हणजे,

या वर्षाच्या सुरुवातीला हळदीला १२ हजार रुपये भाव होता, तर आठ दिवसांपूर्वी हा भाव १७ हजार रुपयांवर होता. आता मात्र तो थेट २२ हजारांवर पोहोचल्याने हळद उत्पादक शेतकऱ्यांच्या भुवया उंचावल्या आहेत.