Nanded to Mumbai in Just 9 Hours via Vande Bharat Express : नांदेडकरांचे स्वप्न अखेर सत्यात उतरणार आहे. मंगळवारी नांदेडहून वंदे भारत एक्सप्रेस धावणार आहे. मुंबई-जालना वंदे भारतचा नांदेडपर्यंत विस्तार करण्यात आला आहे. मंगळवारी सकाळी नांदेड-मुंबई या वंदे भारत एक्सप्रेसचा शुभारंभ होणार आहे. मुख्यमंत्री देवेंद्र फडणवीस नांदेड-मुंबई वंदे भारत एक्सप्रेसला हिरवा झेंडा दाखवणार आहे. यावेळी नांदेडचे भाजप खासदार अशोक चव्हाण, पदाधिकारी, रेल्वेचे वरिष्ठ अधिकारी उपस्थित राहाणार आहेत.

गेल्या अनेक दिवसांपासून नांदेडकरांकडून वंदे भारत एक्सप्रेसची मागणी करण्यात येत होती. लोक प्रतिनिधींकडूनही वंदे भारतच्या मागणीचा जोर होता. त्याला रेल्वेकडून ग्रीन सिग्नल देण्यात आला. जालना-मुंबई ही वंदे भारत एक्स्प्रेस पुढे नांदेडपर्यंत विस्तार करण्यात आला. नांदेड-मुंबई ही वंदे भारत एक्सप्रेस आता ६१० किलोमीटरचे अंतर फक्त ९ तास २५ मिनिटांत पूर्ण करणार आहे.

नांदेड मुंबई वंदे भारत एक्सप्रेस आठवड्यातून सहा दिवस धावणार आहे. या रेल्वेला २० डब्बे असतील. त्यामध्ये एक्झिक्युटिव्ह २ आणि १८ चेअर कार डब्बे असतील. या वंदे भारत एक्सप्रेसमध्ये एकूण १४४० आसन क्षमता आहे. मंगळवारी ही रेल्वे नांदेडमधून सकाळी ११.२० वाजता सुटून रात्री ९.५५ ला मुंबई सीएसएमटी स्थानकात पोचेल.

नांदेडहून मुंबई सीएसएमटीला दररोज सकाळी ५:०० वाजता वंदे भारत सुटेल आणि दुपारी २:२५ वाजता मुंबईला पोहोचेल. मुंबई सीएसएमटीहून दुपारी १:१० वाजता सुटेल आणि रात्री १०:५० वाजता नांदेडला पोहोचेल. ही सेवा आठवड्यातून सहा दिवस चालेल. या प्रवासादरम्यान, ही ट्रेन परभणी, जालना, औरंगाबाद, मनमाड, नाशिक रोड, कल्याण, ठाणे आणि दादर या प्रमुख स्थानकांवर थांबेल.