संजय सुर्यवंशी |नांदेड प्रतिनिधी| साम टीव्ही मराठी

Mahur Ghat tempo accident latest news : रेणुका मातेचे दर्शन घेऊन यवतमाळकडे परतणाऱ्या भाविकांच्या टेम्पोला नांदेड जिल्ह्यातील माहूर येथील किरोळी घाटात भीषण अपघात (Nanded road accident) झाला आहे. हा अपघात पहाटे पाच वाजताच्या सुमारास झाल्याची माहिती मिळाली आहे. या अपघातात तीन जणांचा जागीच मृत्यू झाला आहे, तर पाच जण गंभीर जखमी झाले आहेत. (Yavatmal devotees accident while returning from Renuka Mata temple)

यवतमाळ येथील काही भाविक माहूर येथे श्री रेणुका मातेच्या दर्शनासाठी आले होते. दर्शन आटोपून ते टेम्पोने पुन्हा यवतमाळच्या दिशेने परतत होते. यादरम्यान, किरोळी घाटातील एका नागमोडी वळणावर चालकाचा गाडीवरील ताबा सुटला आणि भरधाव टेम्पो थेट दरीत कोसळला.

अपघाताची माहिती मिळताच परिसरातील नागरिकांनी तातडीने घटनास्थळी धाव घेतली. तसेच पोलिसांनाही याबद्दलची माहिती देण्यात आली. त्यानंतर स्थानिक नागरिक, क्रेन आणि पोलिसांच्या मदतीने बचावकार्य राबवण्यात आले. दरीत कोसळलेल्या टेम्पोमधून जखमींना आणि मृतदेह बाहेर काढण्यात आले.

या भीषण अपघातात तीन जणांचा मृत्यू झाला असून, पाच गंभीर जखमी भाविकांना तातडीने माहूरच्या ग्रामीण रुग्णालयात दाखल करण्यात आले आहे. तिथे त्यांच्यावर सध्या उपचार सुरू आहेत. ऐन सणासुदीच्या काळात घडलेल्या या दुर्घटनेमुळे यवतमाळ आणि माहूर परिसरात शोककळा पसरली आहे.