Summary Pointers in Marathi

• नांदेड- मुंबई वंदे भारत एक्स्प्रेस आजपासून सुरू झाली.

• प्रवाशांना वेगवान आणि आरामदायी प्रवासाची सोय उपलब्ध.

• शीख समुदायासाठी हजूर साहिबला पोहोचणं सोपं.

• आठवड्यातून सहा दिवस धावणार; बुधवारी आणि गुरुवारी सुटणार नाही.

वंदे भारत एक्स्प्रेसने प्रवास करणाऱ्या प्रवाशांसाठी आनंदाची बातमी आहे. नांदेड- मुंबई वंदे भारत एक्स्प्रेस आजपासून सुरू झाली. मुख्यमंत्री देवेंद्र फडणवीस यांनी नांदेड- मुंबई वंदे भारत एक्स्प्रेसला हिरवा झेंडा दाखवला. या सेमी-हायस्पीड ट्रेनमुळे नांदेड आणि परभणीच्या नागरिकांना चांगला फायदा होणार आहे. महत्वाचे म्हणजे त्यांचा प्रवास अधिक वेगवान आणि आरामदायी होणार आहे. ही वंदे भारत एक्स्प्रेस महाराष्ट्रातील यात्रेकरू, पर्यटक आणि नागरिकांना जागतिक दर्जाचा प्रवास करण्याची सोयी उपलब्ध करून देते.

नांदेड- मुंबई वंदे भारत एक्स्प्रेसचा सर्वाधिक फायदा शीख समुदायाला होणार आहे. कारण शीख धर्माच्या पाच तख्तांपैकी एक असलेल्या नांदेडमधील हजूर साहिबला जाणं त्यांना अधिक सोपं होणार आहे. शीख समुदायाच्या लोकांना नांदेडमध्ये अवघ्या काही तासांमध्ये पोहचता येणार आहे. या वंदे भारत एक्स्प्रेसचा थांबा, वेळापत्रक आणि तिकीट ही सर्व माहिती आपण जाणून घेणार आहोत...

थांबा कुठे?

नांदेड- मुंबई वंदे भारत एक्स्प्रेसचा थांबा परभणी, जालना, छत्रपती संभाजीनगर, मनमाड, नाशिक रोड, इगतपुरी, कल्याण, ठाणे, दादर आणि शेवटचा थांबा सीएसएमटी या ठिकाणी असणार आहे.

तिकीटाचे दर किती?

नांदेड- मुंबई वंदे भारत एक्स्प्रेसच्या तिकीटाचे दर देखील समोर आले आहेत. एसी चेअर कारचे तिकीट १,७५० रुपये आणि एक्झिक्युटिव्ह एसी चेअर कारचे तिकीट ३,३०० रुपये असणार आहे.

वेळापत्रक -

वंदे भारत एक्स्प्रेस ०२७०५ ही नांदेडवरून पहाटे ५ वाजता सुटेल आणि दुपारी २.२५ वाजता मुंबई सीएसएमटी येथे पोहोचेल. परतीच्या प्रवासात ही वंदे भारत एक्स्प्रेस मुंबई सीएसएमटीवरून दुपारी १.१० वाजता सुटून रात्री १०.५० वाजता नांदेडला पोहोचेल.

आठवड्यातून ६ दिवस धावणार -

ही वंदे भारत एक्स्प्रेस आठवड्यातून ६ दिवस धावणार आहे. बुधवारी नांदेडवरून आणि गुरूवारी मुंबईवरून ही ट्रेन धावणार नाही. ही ट्रेन ६१० किमी अंतर फक्त ९ तास २५ मिनिटांत पूर्ण करणार आहे. महत्वाचे म्हणजे ही वंदे भारत एक्स्प्रेस २० डब्यांची असणार आहे.