नांदेड जिल्ह्यातील माहुर येथील घाटात एक भीषण अपघाताची घटना घडली आहे. रेणुका मातेचं दर्शन घेऊन परतत असताना एका कारचा भीषण अपघात घडला. रात्रीच्या सुमारास चालकाला घाटात वळणाचा अंदाज न आल्याने कार थेट ४० फूट दरीत कोसळली आहे. या दुर्घटनेत कारमधील सहा भाविक जखमी झाले असून, सर्वांची प्रकृती सध्या धोक्याबाहेर असल्याची माहिती समोर आली आहे.

ही घटना मंगरूळ येथून आलेल्या भाविकांच्या कारला घडली. रेणुका मातेच्या दर्शनासाठी सहा भाविक कारमधून आले होते. दरम्यान, हे भाविक दर्शन आटोपून परत जात होते. मात्र, घाटाच्या एका तीव्र वळणावर चालकाचा गाडीवरील ताबा सुटला आणि कार थेट दरीत कोसळली. सुदैवाने गाडी उलटून एका ठिकाणी अडकली, त्यामुळे मोठी जीवितहानी टळली.

हा अपघात रात्रीच्या सुमारास घडला. यामुळे मदतीसाठी काही वेळ विलंब लागला. मात्र, ग्रामस्थांनी कारमधील सहा जणांना वाचवण्याचा प्रयत्न केला. तसेच त्यांना तातडीने रूग्णालयात नेले. कारमधील जखमी भाविकांवर तत्काळ उपचार करण्यात आले असून, कोणालाही गंभीर दुखापत झाली नाही.

ही संपूर्ण घटना सीसीटीव्ही कॅमेऱ्यात कैद झाली असून, प्रशासनाकडून पुढील तपास सुरू आहे. या धक्कादायक अपघाताच्या घटनेनंतर परिसरात खळबळ उडाली आहे.