माळशिरस तालुक्यातील पिलीव रोडवर एका तरूणाचा नग्न अवस्थेत मृतदेह आढळल्यानं खळबळ उडाली आहे. मृतदेहावर गरम लोखंडी सळईचे चटके आहेत. तसेच त्याच्या शेजारी दुचाकी आढळली आहे. हा संपूर्ण प्रकार प्रेम प्रकरणातून किंवा अनैतिक संबंधातून झाला असल्याचा संशय पोलिसांनी व्यक्त केलाय. या प्रकरणी पोलिसांनी दोघांना ताब्यात घेतलं आहे.

आकाश अंकुश खुर्द-पाटील (वय वर्ष २८) असं मृत तरूणाचं नाव आहे. तरूणाचा मृतदेह माळशिरस पिलीव हद्दीत असणाऱ्या वन विभागाच्या क्षेत्रामध्ये निवस्त्र आढळला. त्याच्या शरीरावर गरम लोखंडी सळईचे चटके होते. तसेच गंभीर जखमा होत्या. तरूणाच्या मृतदेहाच्या शेजारी त्याची मोटारसायकल आढळली.

पोलिसांना याची माहिती मिळाल्यानंतर त्यांनी घटनास्थळी धाव घेतली. घटनेचा पंचनामा केला. तसेच मृतदेह शवविच्छेदनासाठी पाठवलं आहे. अद्याप शवविच्छेदनाचा अहवाल आला नसून, यानंतर मृत्यूचे कारण समोर येईल. दरम्यान, पंचनामा करून पुढील तपास पोलीस करीत आहेत.

पोलीस तपासात हा संपूर्ण प्रकार प्रेम प्रकरण किंवा अनैतिक संबंधातून झाला असावा, असा संशय पोलिसांनी व्यक्त केला आहे. या प्रकरणी पोलिसांनी तपास करून एक तरूणी आणि एका अल्पवयीन मुलाला ताब्यात घेतलं आहे. या प्रकरणी माळशिरस पोलीस अधिक तपास करीत आहेत.