पराग ढोबळे, साम टीव्ही

नागपूर जिल्ह्याच्या कुही तालुक्यातील मांढळ येथील पेट्रोल पंपावर वाघ दिसला. रस्त्यावरच वाघ चालताना दिसला. या वाघाचा व्हिडिओ सोशल मीडियावर व्हायरल झाला आहे. या वाघामुळे परिसरात राहणाऱ्या लोकांच्या मनात भीती निर्माण झाली आहे.

नागपूरच्या कुही तालुक्यातील मांढळ पचखेडी रस्त्यावर नायरा पेट्रोल पंपाजवळ अचानक वाघाचे दर्शन झाल्याने परिसरात भीतीचे वातावरण निर्माण झालं आहे. या मार्गाने जाणाऱ्या नागरिकांनी वाहने थांबवून वाघाचा व्हिडिओ मोबाईलमध्ये कैद केला. तर काही जणांनी प्रत्यक्ष ठिकाणी उभे राहूनही व्हिडिओ बनवले. सध्या हा व्हिडिओ सोशल मीडियावर वेगाने व्हायरल होत आहे.

एकाने तर दुचाकीवर असताना संयम सुचकता ठेवत दुचाकी वळवली. तर एका वाहनाच्या अगदी जवळून वाघ गेलाय. सुदैवानं सकाळी पहाटे घटना घडली, तेव्हा पेट्रोल पंपावर कोणीच नव्हते. गर्दीच्या वेळी वाघाची एन्ट्री झाली असती तर मोठी दुर्घटना घडली असती. या वाघामुळे परिससरात घाबरगुंडी उडाली आहे.

सह्याद्री व्याघ्र प्रकल्पात नर वाघाची एन्ट्री

सह्याद्री व्याघ्र प्रकल्पाच्या हद्दीत नव्या नर वाघाची एन्ट्री झाली आहे. शिलेदार असं या वाघाचे नामकरण करण्यात आले आहे. हा शिलेदार चांदोली राष्ट्रीय उद्यानातील तारा वाघिणीच्या हद्दीत आढळून आला आहे. त्यामुळे आता शिलेदाराचे तारासोबत नवे नाते जुळणार आहे. तारा आणि शिलेदाराची जोडी जमणार का, याकडे वन्यजीव अभ्यासकांचे देखील लक्ष लागले आहे.

याआधी शिलेदार सिंधुदुर्ग जिल्ह्यातील आंबोली या ठिकाणी वन विभागाच्या कॅमेऱ्यामध्ये आढळून आला होता. त्यानंतर 2025 मध्ये हा शिलेदार राधानगरीच्या अभयारण्यात आढळून आला होता. आता सह्याद्री व्याघ्र प्रकल्पात स्थानांतर उपक्रमांतर्गत चंदा, तारा आणि हिरकणी या वाघिणी आणण्यात आल्या आहेत. तर बाजी, सुभेदार आणि सेनापती हे नर वाघ आहेत. आता यामध्ये नव्याने शिलेदाराची एन्ट्री झाली आहे.