Nagpur News :

राज्य परिवहन मंडळाच्या बसेसच्या दुरावस्थेबद्दल अनेकदा प्रश्न उपस्थित केले जातात. कधी छप्पर उडालेली, तर कधी गळकी एसटी बस रस्त्यावरुन धावताना तुम्ही पाहिली असेल. असाच एक धक्कादायक प्रकार नागपुरात समोर आला आहे.

नागपूरच्या एसटी आगारातून निघत असलेल्या एसटीचा अचानक ब्रेल फेल होऊन अनियंत्रित झाल्याची घटना घडली आहे. या एसटीने आगारात पार्किंगमध्ये उभे असलेल्या चार दुचाकी वाहनांना चिरडत नेले. शेवटी सुरक्षा भिंतीवर एसटी आदळली. (Latest Marathi News)

या अपघातात आगाराची सुरक्षा भिंतही पडली. सुदैवाने या अपघातात चालक बचावला आहे. त्यामुळे अनफिट एसटी रस्त्यावर धावतात का? असा प्रश्न पुन्हा ऐरणीवर आला आहे. नागपूरच्या वर्धमाननगर आगारातून चालकाने देवरी जाण्यासाठी बस काढत असताना हा विचित्र अपघात घडला. बसचे ब्रेक फेल असल्याने हा अपघात झाला.

नियमानुसार वाहन परीक्षकांनी बस आगारातून निघण्याच्या आधी फिट आहे की नाही हे तपासणे अनिवार्य असते. मात्र तसे होत नसल्याने हे अपघात होत आहेत. सुदैवाने ही बस आगाराच्या बाहेर न निघाल्याने मोठी दुर्घटना टळली आहे.