पराग ढोबळे,नागपूर

Nagpur Police Officer Pankaj Thakur Murder News नागपूरमधून मोठी बातमी समोर आली आहे. शहराच्या एमआयडीसी पोलीस स्टेशन अंतर्गत येणाऱ्या वानाडोंगरी येथील मातोश्री नगरमध्ये एका राज्य राखीव दलाच्या पोलीस कर्मचाऱ्याची हत्या करण्यात आली आहे. यामध्ये पोलीस कर्मचारी पंकज ठाकूर यांचा मृत्यू झाला, तर त्यांचा मेहुणा यामध्ये गंभीर जखमी झाला आहे. याप्रकरणी पोलिसांनी दोघांना अटक केली आहे.

मिळालेल्या माहितीनुसार, मृत पंकज ठाकूर हे आपल्या कुटुंबासह मातोश्री नगरमध्ये राहत होते आणि एसआरपीएफ (राज्य राखीव पोलीस दल) मध्ये कार्यरत होते. आरोपी तरुण आकाश मंडल हा गेल्या एक वर्षापासून त्यांच्या अल्पवयीन मुलीला त्रास देत होता. आकाश सतत ठाकूर यांच्या घराच्या परिसरात वावरत असे. यावरून पंकज ठाकूर यांनी यापूर्वीही त्याला ताकीद दिली होती.

मात्र आकाशने गुरुवारी दुपारी पुन्हा ठाकूर यांच्या घराजवळ गेला. यावेळेस पंकज ठाकूर यांनी त्याला फटकारले. एवढंच काय एक कानशिलात लगावली. याच रागातून आरोपी आकाश मंडलने त्याचा भाऊ हर्षित मंडल आणि आई पुष्पा मंडल यांच्यासह रात्री साडेदहाच्या सुमारास पंकज ठाकूर यांना घराबाहेर बोलावले आणि लोखंडी सळ्यांनी त्यांच्यावर हल्ला केला.

यादरम्यान मध्यस्थी करायला गेलेला ठाकूर यांच्या मेहुण्यावर देखील हल्ला झाला. या हल्ल्यात दोघे जखमी झाले. दोन्ही जखमींना तातडीने जवळच्या रुग्णालयात दाखल करण्यात आले, मात्र उपचारादरम्यान पंकज ठाकूर यांचा मृत्यू झाला.

घटनेनंतर आरोपी घटनास्थळावरून फरार झाले होते, परंतु पोलिसांनी तत्परता दाखवत दोन आरोपींना अटक केली आहे. तिसऱ्या आरोपीला अटक करण्याची प्रक्रिया सुरू आहे. विशेष म्हणजे, आरोपी पुष्पा मंडल ही देखील पोलीस विभागातच लिपिक पदावर कार्यरत आहे. एमआईडीसी पोलिसांनी हत्येचा गुन्हा दाखल करून पुढील तपास सुरू केला आहे.