नागपूर : राष्ट्रवादीचे सर्वेसर्वा शरद पवार यांच्या मुंबईतील 'सिल्व्हर ओक' या निवासस्थानाबाहेर संपकरी एसटी कर्मचाऱ्यांनी शुक्रवारी (८ एप्रिल) आंदोलन केले. या आंदोलनाने हिंसक वळण धारण केले. आंदोलनकर्त्या एसटी कर्मचाऱ्यांनी (ST Worker) पवार यांच्या घरावर दगडफेक केली तसेच चपलाही फेकल्या. या घटनेमुळे राजकारण चांगलेच ढवळून निघाले असून कालच्या घटनेमुळे राज्यातील राष्ट्रवादीचे (NCP) कार्यकर्ते चांगलेच आक्रमक झाले आहेत. (Nagpur: Security will be beefed up for Sharad Pawar)

हे देखील पहा :

पवार यांच्या घरावर झालेल्या हल्ल्यानंतर काल एसटी कर्मचाऱ्यांचे वकील ऍड.गुणरत्न सदावर्ते (Gunratna Sadavarte) यांच्यासह १०७ आंदोलनकर्त्या कर्मचाऱ्यांना मुंबईच्या गावदेवी पोलिसांनी विविध कलमांखाली अटक केली आहे. याच घटनेच्या पार्श्वभूमीवर खासदार शरद पवार यांच्या सुरक्षा व्यवस्थेत वाढ करण्यात आली आहे. शरद पवार (Sharad Pawar) हे उद्या विदर्भाच्या दौऱयावर आहेत. याच दौऱ्याच्या पार्श्वभूमीवर पवारांच्या सुरक्षेत वाढ करण्यात येणार असल्याची माहिती नागपूर पोलीस आयुक्तांनी दिली आहे.

उद्या रविवारी सकाळी १० वाजता शरद पवार यांचं नागपूर विमान (Nagpur) तळावर आगमन होणार आहे. नागपूर विमानतळावरच राष्ट्रवादीचे कार्यकर्ते शरद पवार यांचा सत्कार करणार आहेत. शरद पवार यांच्या स्वागतासाठी विमानतळावर राष्ट्रवादीच्या पदाधिकाऱ्यांसह कार्यकर्त्यांची मोठी गर्दी होण्याची शक्यता आहे. यामुळेच उद्या नागपूर विमानतळावर अतिरिक्त सुरक्षा व्यवस्था केली जाणार आहे.

Edited By : Krushnarav Sathe