पराग ढोबळे, साम टीव्ही

नागपुरातून मोठी बातमी हाती आली आहे. नागपूरमध्ये हावडा-अहमदाबाद एक्स्प्रेसच्या खिडकीच्या काचा फुटल्याची घटना घडली आहे. रेल्वे सुरक्षा बलाने ही दगडफेक नसल्याचा दावा केला आहे. तर प्रवाशांनी दगडफेक झाल्याचा आरोप केला आहे. या घटनेनंतर एक्स्प्रेसमधील प्रवाशांमध्ये एकच भीती पसरली आहे.

नागपुरात हावडा अहमदाबाद एक्स्प्रेसवर अचानक काचेवर दगड आल्याने खिडकीच्या काचा फुटल्या आहेत. हावडा सुपरफास्ट एक्स्प्रेसच्या बी २ कोचच्या काचा फुटल्या. या कोचमधील प्रवाशांनी दगडफेक झाल्याचा आरोप केला आहे. यावर दगडफेक झाली की, रेल्वे ट्रॅकवरचे दगड उडाले? या संदर्भात आणखी शोध सुरू असल्याचं रेल्वे सुरक्षा बलाच्या अधिकाऱ्याने सांगितलं आहे.

या घटनेनंतर रेल्वे सुरक्षा बलाचे पोलीस निरीक्षक विजय भालेकर यांनी घटनास्थळी धाव घेतले. त्यानंतर तिथे कोणीही आढळले नाही. त्यानंतर त्यांनी रेल्वे ट्रॅकवरील दगड उडाले असल्याचा दावा केला. या प्रकरणी चौकशी सुरू असल्याची माहिती रेल्वे सुरक्षा बलाचे अधिकारी विजय भालेकर यांनी दिली आहे .

दरम्यान, नागपुरातील इतवारी, कामठी, कन्हान परिसरात अनेकदा रेल्वेवर दगडफेकीच्या घटना घडल्या आहेत. नागपूरच्या बिलासपूर वंदेभारत एक्स्प्रेसवर देखील दगडफेकीच्या घटना घडल्या आहेत. हावडा अहमदाबाद एक्स्प्रेसच्या खिडकीच्या आज काचा फुटल्या आहेत. मात्र, या घटनेत कुणालाही इजा झालेली नाही. या घटनेनंतर कामठी रेल्वे स्थानकावरून रवाना झाली. या घटनेनंतर रेल्वे पोलीस देखील चौकशीसाठी पोहोचले.