पराग ढोबळे, साम टीव्ही

नागपुरात पतीने पत्नीच्या चारित्र्यावर संशय घेत तिला बेदम मारहाण केल्याची धक्कादायक घटना समोर आली आहे. या मारहाणीत गंभीर जखमी झालेल्या पत्नीचा उपचारादरम्यान मृत्यू झाला. ही घटना गुरुवारी रात्री कपिल नगर पोलिस ठाण्याच्या हद्दीत घडली. मृत महिलेचे नाव लक्ष्मी रोशन शहाकार असून तिच्या पतीचे नाव रोशन शहाकार आहे. पोलिसांनी दिलेल्या माहितीनुसार, रोशन हा पत्नीच्या चारित्र्यावर संशय घेत तिच्याशी वारंवार वाद घालत होता.

गुरुवारी रात्रीही दोघांमध्ये याच कारणावरून वाद झाला. यावेळी रोशनने लक्ष्मीला बेदम मारहाण केली. मारहाणीनंतर लक्ष्मीची प्रकृती अचानक बिघडली. त्यानंतर रोशनने तिला उपचारासाठी मेयो रुग्णालयात दाखल केले. मात्र, उपचारादरम्यान लक्ष्मीचा मृत्यू झाला. दरम्यान, आरोपी रोशन शहाकार याच्यावर यापूर्वीही गंभीर गुन्ह्याचा आरोप होता. 2006 मध्ये एका व्यक्तीच्या हत्या प्रकरणात तो आरोपी होता. या प्रकरणातून दोषमुक्त झाल्यानंतर त्याने नात्यातील लक्ष्मीसोबत प्रेमविवाह केला होता.

या घटनेमुळे परिसरात खळबळ उडाली आहे. आईच्या मृत्यूमुळे तीन आणि सात वर्षांच्या दोन मुलांच्या डोक्यावरचं मायेचं छत्र हरपलं आहे. या प्रकरणी कपिल नगर पोलिसांकडून पुढील तपास सुरू आहे.