नागपूर शहरात सुरू असलेल्या उड्डाणपूलांच्या बांधकामामुळे अशोक चौक परिसरात विचित्र प्रकार घडला आहे. इंदोरा ते दिघोरी दरम्यान सुमारे एक हजार कोटी रुपये खर्चून तयार होणाऱ्या उड्डाणपूलाचा एक भाग थेट घराच्या बाल्कनीतून जात असल्याचं दृश्य समोर आलं आहे. या घराचे मालक प्रविण पत्रे असून त्यांच्या घराच्या बाल्कनीतून उड्डाणपूलाच्या रोटरीचा एक भाग जातो आहे. त्यामुळे हा पूल सध्या शहरात चर्चेचा विषय बनला आहे.

या प्रकरणी राष्ट्रीय महामार्ग प्राधिकरणाने (NHAI) नागपूर महानगरपालिकेला पत्र पाठवून संबंधित घर हटवण्याची मागणी केली आहे. मनपाकडून मात्र हे घर अनधिकृत असल्याचे स्पष्ट करण्यात आले आहे. यामुळे पुढे घर काढले जाणार का, अथवा पूलाचा आराखडा बदलला जाणार का, हा प्रश्न उपस्थित होत आहे.

विशेष म्हणजे, घरमालक प्रविण पत्रे यांनी याविषयी आपली भूमिका स्पष्ट करताना उड्डाणपूलाबाबत त्यांना काही हरकत नसल्याचं सांगितलं आहे. मात्र बाल्कनीतून पूल जात असल्याने भविष्यात अपघाताचा धोका कायम राहणार असल्याची भीती स्थानिक नागरिक व्यक्त करत आहेत.

सध्या या उड्डाणपूलाचे काम जोरात सुरू असून, शहरातील वाहतूक कोंडी कमी करण्यासाठी हा पूल महत्त्वाचा ठरणार आहे. पण उड्डाणपूलाचा काही भाग चक्क घराच्या बाल्कनीतून जाणे, हे नागपूरकरांसाठी आश्चर्यकारक दृश्य ठरत आहे. यापुढे वाहतूक सुरू झाल्यानंतर पत्रे यांच्या घरावर कसा परिणाम होणार, तसेच प्रशासन या परिस्थितीवर काय उपाययोजना करते, हे पाहणे उत्सुकतेचे ठरणार आहे.