पराग ढोबळे, साम प्रतिनिधी

अन्याय झाला म्हणून आपण न्याय मागण्यासाठी आपल्या हक्कासाठी पोलिसांकडे मदत मागतो. कायद्याचे रक्षक आपल्याला मदत करतील ,अशी आशा ठेवून त्यांच्याकडे दाद मागतो. नागपुरात मात्र शिवीगाळ करणाऱ्याविरोधात तक्रार करण्यासाठी गेलेल्या व्यक्तीलाच मारहाण झाल्याची घटना घडली आहे. तक्रार देणाऱ्या फिर्यादीच्या कानफटीत पोलिसांनी लागवली, त्यामुळे फिर्यादी व्यक्तीच्या कानाला गंभीर दुखापत झाली आहे.

पोलिसांच्या वर्तनाचा अजब प्रकार नागपूरमधील काटोल पोलीस स्टेशनमध्ये घडला आहे. कपिल रेवतकर असं फिर्यादीचे नाव आहे. कपिल रेवतकर खामगाव येथील रहिवासी आहेत. फिर्यादी कपिल रेवतकर यांनी दिलेल्या माहितीनुसार, खामगाव येथील रुपेश पवार नावाचा व्यक्ती दुचाकीवरून जात असताना कपिल रेवतकर यांच्याशी वाद घातला होता. काटोल मार्गावर या दोघांचा वाद झाला होता.

त्यानंतर कपिल रेवतकर रुपेश पवारविरोधात काटोल पोलीस स्टेशनला तक्रार देण्यासाठी 24 फेब्रुवारीला गेला. त्याचवेळी रुपेश पवार हा आधीच पोलीस स्टेशनला जाऊन बसला होता. यावेळी तक्रार देत असताना शाब्दिक वाद वाढला. कपिल रेवतकर कौटुंबीय बोलत असताना एका पोलीस कर्मचाऱ्याने त्याला मागून मारलं. या मारहाणीत रेवतकर यांच्या कानाचा पडदा फाटला. त्याला उपचारासाठी किमान आणखी तीन ते चार महिने लागणार आहेत.

दरम्यान २४ फेब्रुवारी रोजी ही घटना घडली होती. याप्रकरणी कपिल रेवतकर यांनी ६ मार्चला नागपूर पोलीस अधीक्षकांची भेट घेतली, त्यानंतर त्यांना आपली कैफियत मांडली. पाठीमागून मारणारा पोलीस कर्मचारी कोण होता हे कपिल यांना कळू शकले नाही. मात्र त्या ठिकाणी पोलीस कर्मचाऱ्यांनी मारहाण केल्याची तक्रार कपिल रेवतकर यांनी दिली आहे. पोलिसांनी सीसीटीव्ही तपासून कारवाई करावी, अशी मागणी कपिल रेवतकर यांनी केली आहे.

कपिल रेवतकर सध्या भीतीच्या वातावरणात असून या सगळ्या संदर्भात पोलिसांनी रुपेश पवार या शिवीगाळ करणाऱ्या व्यक्तीवर कारवाई करावी तसेच मारहाण करणाऱ्या पोलीस कर्मचाऱ्यांवर सुद्धा कारवाई करावी, अशी मागणी केली.