पराग ढोबळे

नागपूर : व्यसनाची सवय लागल्याने ते पूर्ण करण्यासाठी कोणत्या थराला जातील हे सांगणे अवघड आहे. असाच काहीसा प्रकार नागपूरमध्ये उघडकीस आला आहे. व्यसन पूर्ण करण्यासाठी खिशात पैसे नसल्याने मोटारसायकल चोरी करण्याचा धंदा दोन भावांनी सुरु केला होता. पोलीस तपासात हे धक्कादायक कृत्य समोर आले असून दोघांनाही पोलिसांनी ताब्यात घेतले आहे. 

नागपूर शहरातील विविध भागात दुचाकी चोरीच्या घटना वाढल्या होत्या. याबाबत प्राप्त तक्रारींवरून पोलिसांनी तपास सुरु केला होता. या तपासात पोलिसांनी ऋषभ पसोपा व ऋतिक पसोपा या दोन सख्ख्या भावांना मोठ्या शिताफीने ताब्यात घेतले आहे. या दोन्ही आरोपी भावांना ड्रगचे व्यसन असल्याने व्यसन करायला पैसे मिळवण्यासाठी ते दुचाकी चोरी करत असल्याची माहिती पोलिस चौकशीत समोर आली आहे. 

चोरीचे वाहन दलालाकडे गहाण ठेवत 

व्यसनाचा खर्च भागविण्यासाठी मोटर सायकल चोरी करणाऱ्या दोन सख्खे भाऊ असलेल्या आरोपीला अटक केली आहे. दरम्यान चौकशीत सदरील आरोपी हे वाहन चोरी करून वाठोडा परिसरातील दलालाकडे ते गहाण ठेवून पैसे मिळवायचे. यानंतर या पैशातून व्यसन पूर्ण करत असल्याची धक्कादायक माहिती समोर आली आहे.  

५० लाखांचा मुद्देमाल हस्तगत 

दरम्यान दुचाकी चोरीचा तपास करत असताना पोलिसांना सुगावा लागला होता. त्यानुसार हुडकेश्रर पोलिसांनी जवळपास १०० सीसीटीव्ही कॅमेरे तपासून दोन्ही आरोपींना अटक केली आहे. दरम्यान पोलिसांनी या कारवाईत ५० चोरीची वाहने असा जवळपास ५० लाख रुपयाचा मुद्देमाल जप्त केला आहे. तसेच आरोपींनी या आधी कुठे चोरी केली का? किंवा पूर्वीचे गुन्हे दाखल आहे का? याचा तपास पोलिस करत आहेत.