पराग ढोबळे, नागपूर

Nagpur Dating App Scam News डेटिंग अ‍ॅपचा वापर करून अनेकदा गैरप्रकार केला जातो. अशीच एक घटना नागपूरमध्ये घडली आहे. ऑनलाइन डेटिंग अ‍ॅपच्या माध्यमातून तरुणांची फसवणूक करण्यात आल्याचा प्रकार समोर आला आहे. प्रेमाच्या नावाखाली जाळं टाकत, बारमध्ये नेऊन हजारोंची बिल देण्यास भाग पाडत वसुली केली जात असल्याचं उघड झालं आहे. या टोळीचा पर्दाफाश करण्यात आला आहे.

मिळालेल्या माहितीनुसार, नागपुरातील एका तरुणाची हॅपन या डेटिंग अ‍ॅपवर अज्ञात तरुणीशी ओळख झाली. या तरुणीने पीडित तरुणाला भेटण्यासाठी बारमध्ये बोलावले. ठरल्या प्रमाणे दोघेही नागपूरमधील एका बारमध्ये भेटले. बारमध्ये पोहोचताच त्या तरुणीने महागड्या दारू आणि खाद्यपदार्थांची ऑर्डर देण्यास सुरुवात केली. काही ऑर्डर मागावत असतांना तरुणाला शंका आली आणि त्याने वेटरला बिल आणायला लावलं. काही वेळातच वेटरने ३४ हजार रुपयांचं बिल समोर ठेवलं.

हे बील पाहून पीडित तरुण देखील चक्रावला. त्याने तिथून निघण्याचा निर्णय घेतला. मात्र बारमधील कर्मचाऱ्यांनी तरुणाला बदनामी, मारहाण आणि जीव घेण्याची धमकी देत जबरदस्तीने त्याच्याकडून पैसे उकळले. धक्कादायक म्हणजे तरुणाला भेटायला आलेली संबंधित तरुणी घटनास्थळावरुन पसार झाली.

मात्र,हॉटेलच्या कर्मचाऱ्यांना घाबरून सदर तरुणाने हॉटेलचं पूर्ण बिल भरलं. त्यानंतर त्याला आपली फसवणूक झाल्याचे लक्षात आले. त्याने तडक पोलीस ठाण्यात धाव घेत आरोपी तरुणी, बार मालक, मॅनेजर आणि बाऊन्सरविरोधात तक्रार दाखल केली. तरुणाच्या जबाबानुसार पोलिसांनी आरोपींविरोधात गुन्हा दाखल केला. तसेच याप्रकरणी तपास सुरु केला आहे. या अशा डेटिंग अ‍ॅपच्या सहाय्याने केल्या जाणाऱ्या फसवणुकीला बळी न पडत सतर्क राहण्याचं आवाहन पोलिसांनी केलं आहे.