पराग ढोबळे, नागपूर

Nagpur 12th Class Yash Jhade Student Sucide नाशिकमध्ये इयत्ता १० वीच्या विद्यार्थ्याने आत्महत्या केल्याची घटना ताजी असतानाच नागपूरमध्ये १२ वीच्या विद्यार्थ्याने एम्प्रेस मॉलमधून उडी मारून आत्महत्या केली असल्याची घटना समोर आली आहे. यश सुनील झाडे असं मृतक विद्यार्थ्यांच नाव असून पोलीस याप्रकरणी तपास करत आहेत.

मिळालेल्या माहितीनुसार, यश सुनील झाडे हा मानेवाडा येथील जवाहर नगर परिसरात राहत होता. इयत्ता १२ वीच्या परीक्षा नुकत्याच संपल्या असून विद्यार्थ्यांच्या सुट्ट्या सुरु झाल्या आहेत. मात्र तरीही तो दररोज घरच्यांना “पेपर आहे” असे सांगून घराबाहेर पडत होता. कालही तो घरातून पेपर असल्याचं सांगून निघाला.

मात्र घरातून निघाल्यानंतर तो रात्री उशिरापर्यंत परतला नाही. तसेच त्याचा फोनही बंद असल्याने कुटुंबीयांनी हुडकेश्वर पोलिस ठाण्यात हरवल्याची तक्रार दाखल केली. पोलिसांनी घटनेची गांभीर्यता लक्षात घेऊन तपास सुरु केला. पोलीस तपासादरम्यान अशी माहिती मिळाली की, यशने एम्प्रेस मॉलमधून चौथ्या मजल्यावरून उडी मारून आत्महत्या केल्याचे उघड झाले.

यशने आत्महत्या का केली याचं कारण अद्याप उघड झाले नसून पोलीस या घटनेचा सखोल तपास करत आहेत. पोलिसांनी घटनास्थळी पंचनामा केला असून मृतदेह शवविच्छेदनासाठी पाठवण्यात आला आहे. दरम्यान या घटनेने खळबळ उडाली आहे.