नागपुरात चौथीत शिकणाऱ्या दहा वर्षीय विद्यार्थिनीसोबत गैरवर्तन केल्याचा धक्कादायक प्रकार समोर आला आहे. विद्यार्थिनी शिकवणी वर्गात एकटी असताना आरोपीने तिच्याशी गैरवर्तन केल्याचा आरोप आहे. या प्रकरणी एमआयडीसी पोलिस ठाण्यात पोक्सो कायद्यासह भारतीय न्याय संहितेच्या (BNS) संबंधित कलमांनुसार गुन्हा दाखल करण्यात आला आहे.

पोलिसांनी दिलेल्या माहितीनुसार, गुरुवारी सायंकाळी सुमारे चार ते साडेचारच्या दरम्यान संबंधित विद्यार्थिनी शिकवणी वर्गासाठी गेली होती. मात्र, त्यावेळी शिक्षिका वर्गात उपस्थित नव्हत्या. त्यामुळे विद्यार्थिनी वर्गात एकटीच अभ्यास करत होती. याचवेळी आरोपीने वर्गात येऊन तिच्याशी गैरवर्तन केल्याचा आरोप तक्रारीत करण्यात आला आहे. घटनेनंतर विद्यार्थिनी घाबरली आणि शिकवणीचा वर्ग पूर्ण होण्यापूर्वीच ती घरी परतली. घरी आल्यानंतर तिने रडत आईला घडलेला प्रकार सांगितला. मुलीने दिलेल्या माहितीनंतर कुटुंबीयांनी तातडीने एमआयडीसी पोलिस ठाणे गाठून तक्रार दाखल केली.

पोलिसांच्या माहितीनुसार, या प्रकरणातील आरोपी हा संबंधित शिकवणी घेणाऱ्या शिक्षिकेचे वडील असल्याचे समोर आले आहे. तक्रार मिळाल्यानंतर पोलिसांनी प्रकरणाचे गांभीर्य लक्षात घेत तपास सुरू केला. या प्रकरणी पोक्सो कायद्याच्या कलम ८ आणि १२ तसेच बीएनएसच्या कलम ७५(१) अंतर्गत गुन्हा दाखल करण्यात आला आहे. अल्पवयीन मुलीशी संबंधित प्रकरण असल्याने पोलिसांकडून तपासात आवश्यक ती खबरदारी घेतली जात आहे.

घटनेची सविस्तर चौकशी सुरू असून, आरोपीविरोधातील आरोपांची पडताळणी करण्याचे काम एमआयडीसी पोलिसांकडून सुरू आहे. तपासादरम्यान संबंधित व्यक्तींचे जबाब आणि उपलब्ध पुरावे तपासले जाणार असल्याची माहिती पोलिसांनी दिली आहे. या घटनेमुळे परिसरात खळबळ उडाली असून, अल्पवयीन मुलांच्या सुरक्षिततेचा प्रश्न पुन्हा ऐरणीवर आला आहे.