अमोल कलये, साम प्रतिनिधी

रत्नागिरी-मुंबई गोवा महामार्गावरील भीषण अपघात झालाय. कोळसा वाहतूक करणाऱ्या ट्रकने सहा वाहनांनी धडक दिलीय. हा भीषण अपघात हातखंबा गावात घडलाय. या अपघातात एका २० वर्षीय तरुणाचा मृत्यू झालाय. तर चार जण जखमी झालेत. ट्रकने चार चारचाकी, तीन दुचाकी आणि एका रिक्षाला धडक दिलीय. अपघातात जखमी झालेल्यांना जिल्हा शासकीय रुग्णालयात हलवले आहे. विशेष म्हणजे ट्रकची ज्या वाहनांना धडक बसलीय त्या वाहनामध्ये आरटीओ विभागाची गाडी आहे. दरम्यान महामार्ग पोलीस घटनास्थळी दाखल झाले आहेत. सतत घडणाऱ्या अपघातामुळे हातखंबा ग्रामस्थ भितीच्या छायेत जगत आहेत.

दरम्यान अपघाताच्या घटनेनंतर उदय सामंत यांनी हातखंबामधील घटनास्थळी भेट दिली. वारंवार होणाऱ्या अपघातांवर मार्ग काढण्यासाठी उद्या अधिकारी, ग्रामस्थांची बैठक बोलावली आहे. पूर्वीच्या ठेकेदाराने जे वेळकाढू धोरण केलं होतं. पावसामुळे किंवा अन्य काही गोष्टींमुळे सध्या 2 किलोमीटर परिसरात या रस्त्याला खड्डे आहेत. त्यामुळे लोडची गाडी कदाचित आवरत नाही. आज दुर्दैवाने पुन्हा अपघात होऊन, २० वर्षाच्या तरुणाचा मृत्यू झाल्याची माहिती सामंत यांनी दिली.

महामार्गावरील या भीषण अपघातात शिवम रवींद्र गोताड (२०, झरेवाडी, रत्नागिरी) या तरुणाचा मृत्यू झालाय. त्याच्या दुचाकीच्या मागील बाजूस बसलेला निशांत कळंबटे (२०, झरेवाडी, रत्नागिरी) या तरुणाच्या डोक्याला गंभीर दुखापत झालीय. तर आणखी चार जण किरकोळ जखमी झालेत. अपघातामुळे महामार्गावर वाहतूक कोंडी झालीय. हे दोघेही आयटीआय रत्नागिरी येथे शिक्षण घेत होते. घरी जात असताना त्यांच्या दुचाकीला ट्रेलरने उडवलं.

हातखंबा येथील हायस्कूलसमोरील तीव्र उतारावर भरधाव ट्रक अनियंत्रित झाला. त्यामुळे या ट्रकची सहा वाहनांना धडक बसली. यामध्ये शिवम गोताड याचा जागीच मृत्यू झाला. ३ ते ४ दुचाकींना धडक देत अनियंत्रित ट्रकने चार कारलाही धडक दिली. या वाहनांमध्ये आरटीओ विभागाच्या गाडीचाही समावेश आहे. परिणामी महामार्गावर काही काळ वाहतूक कोंडी झाली आहे.

पोलिसांनी अपघाताची माहिती मिळताच घटनास्थळ गाठले असून परिस्थिती पूर्ववत करण्याचा प्रयत्न सुरु आहे. महामार्गावरील अवजड वाहनांची अनियंत्रित वाहतूक यामुळे वारंवार अपघात होत असल्याने हातखंबा परिसरात भीतीचे वातावरण आहे. या अपघाताची नोंद करण्याची कारवाई सुरू आहे.