Mankhurd Crime News : मुंबईच्या मानखुर्द येथे ३० एप्रिल रोजी गोळीबाराची मोठी घटना घडली. या घटनेत एका महिलेचा मृत्यू झालाय. शेजारच्यांशी झालेल्या वादातून महिलेवर गोळ्या झाडून तिची हत्या करण्यात आली. हल्ला केल्यानंतर घटनेतील दोन्ही आरोपी फरार होते. या आरोपींना शोधण्यात पोलिसांना आता यश आलं आहे. (Latest Marathi News)

शनिवारी घडलेल्या या धक्कादायक घटनेत मानखुर्द (Mankhurd) पोलिसांनी गुन्हा दाखल करत, आरोपींना शोधण्यासाठी १४ पथके तयार केली होती. या पथकांनी तपास करत रविवारी रत्नागिरी येथून गोळीबार करणाऱ्या सोनू सिंह (४२) आणि अतिष सिंह (२२) याना अटक केली आहे.

नेमकं काय घडलं?

डीसीपी हेमराज सिंह राजपूत यांनी सांगितले की, मानखुर्द परिसरात शेजारी राहणाऱ्या दोन कुटुंबातील महिलांमध्ये भांडण झाले. यातील एका महिलेच्या पती आणि मुलाने दुसऱ्या महिलेवर गोळीबार केला यात तिचा मृत्यू झाला. दोन्ही आरोपींचा शोध लागला असून या प्रकरणी अधिक तपास सुरू आहे.

दोन कुटुंबियांमध्ये झालेल्या शुल्लक वादातून ही घटना घडली आहे. सदर घटना एका सीसीटीव्ही कॅमेऱ्यात देखील कैद झाली आहे. व्हिडिओमध्ये (Video) गोळीबार झाल्याची संपूर्ण घटना स्पष्टपणे दिसत आहे.