महाराष्ट्र राज्य मार्ग परिवहन महामंडळाच्या ताफ्यातील 'शिवशाही' बसबाबत राज्य सरकार महत्त्वाचा निर्णय घेण्याच्या तयारीत आहे. प्रवाशांच्या पसंतीस उतरलेली शिवशाही आता नव्या साध्या अवतारात रस्त्यावर धावताना दिसेल, असे सांगितले जात आहे. सततचे बिघाड आणि प्रवाशांचा घटता प्रतिसाद पाहता, महामंडळाच्या मालकीच्या ४५३ शिवशाही बस आता निमआराम आणि साध्या बसमध्ये रूपांतर केल्या जाणार आहेत.

एसटी महामंडळाकडे स्वमालकीच्या एकूण ६८८ शिवशाही बस आहेत. त्यापैकी ४५३ बसेस सध्या सुस्थितीत आहेत. मात्र या बसचे आयुर्मान १० वर्षांपेक्षा जास्त नसल्याचे शासनाकडून सांगण्यात येत आहे. वारंवार होणारे तांत्रिक बिघाड, वातानुकूलित यंत्रणेतील तक्रारींमुळे या बसचे रूपांतर करण्याचा निर्णय घेण्यात आला आहे. शिवशाही बसमध्ये वारंवार तांत्रिक बिघाड होत असल्याने प्रवासी या बसकडे पाठ फिरवत आहेत, हे शासनानेही कबूल केल्याचे सांगितले जातंय.

महाराष्ट्र राज्य मार्ग परिवहन महामंडळाच्या ताफ्यात लवकरच नव्या दमाच्या बस दाखल होणार आहेत. गर्दीच्या मार्गांवर प्रवाशांना उभे राहून प्रवास करावा लागू नये, यासाठी ३X२ आसन रचनेच्या तब्बल ५५ आसनी अत्याधुनिक बसची खरेदी करण्यात आलीय. या नव्या बसला 'हिंदवी स्वराज्याची जननी असलेल्या राजमाता जिजाऊ' यांचे नाव देण्यात आले आहे.

प्रवाशांचा प्रवास अधिक सुखकर आणि सन्मानजनक करण्यासाठी ही सेवा सुरू केली जातेय. या बसेसमध्ये ५५ प्रवासी आरामात बसू शकतील. मार्च २०२६ पासून या बस टप्प्याटप्प्याने राज्याच्या विविध आगारांमध्ये दाखल होणार आहेत. सुरुवातील अतिशय वर्दळीच्या आणि लांब पल्ल्याच्या मार्गांवर या गाड्या सोडण्यात येणार आहेत. या आधुनिक बसमध्ये ३ बाय २ अशा पद्धतीची आसन रचना असणार आहे.