मेहनत आणि सातत्य असल्यावर तुम्हाला यश हे मिळतेच. प्रत्येकजण आपल्या मेहनतीच्या जोरावर काहीही करु शकते. दरम्यान, असं यश मोहोळ तालुक्यातील सुरेखा सौदागर कांबळे यांनी मिळवलं आहे. त्यांनी एमपीएससी परीक्षेत मुलींमध्ये प्रथम येऊन एक नवीन विक्रम केला आहे. एमपीएससी ही सर्वात अवघड परीक्षा आहे. या परीक्षेत पास होणेदेखील खूप कठीण असते परंतु सुरेखा यांनी हे यश मिळवलं आहे.

गरीब कुटुंबात लहानाची मोठी झाली

सुरेखा यांचे बालपण खूप गरीब कुटुंबात गेले. सुरेखा यांचे वडील सौदागर शंकर कांबळे हे जनावरांच्या बाजारात बैलांची शिंगे तासून द्यायचे काम करायचे. त्यांनी परिस्थिती खूप हालाखीची होती. परंतु त्यांनी कधीही याचा परिणाम मुलींच्या शिक्षणावर होऊ दिला नाही. याचेच फळ त्यांना मिळाले. त्यांच्या दोन मुली या प्रशासकीय सेवेत काम करत आहेत.

सुरेखा या लहानपणापासूनच खूप हुशार होत्या. त्यांनी जिल्हा परिषदेच्या शाळेत शिक्षण घेतले. सातवीनंतरचे शिक्षण त्यांनी गावातील माध्यमिक शाळेत घेतले. यानंतर त्यांनी कृषी महाविद्यालयात बी.एस्सी अॅग्री पदवी प्राप्त केली.

सुरेखा यांनी पहिल्यांदा २०२० मध्ये एमपीएससी (MPSC) परीक्षा दिली.याचवेळी त्या मुलींमध्ये पहिल्या आल्या. त्यांच्या आयुष्याचा तोच टर्निंग पॉइंट ठरला. यावेळी त्यांनी २०२१ मध्ये दुसऱ्यांदा परीक्षा दिली. यानंतर त्यांची क्लास १ पदावर निवड झाली. आईवडिलांनी घेतलेल्या मेहनीतचे त्यांनी खऱ्या अर्थाने चीज केले असं म्हणायला हरकत नाही.