>> प्रमोद जगताप

Modi Govt Cabinet Expansion: राजकारणाशी संबंधित एक मोठी बातमी समोर आली आहे. लवकरच केंद्रातील मोदी सरकारच्या मंत्रिमंडळाचा विस्तार होऊ शकतो. यात महाराष्ट्राच्या वाटेलाही दोन मंत्रिपद येऊ शकतात.

मिळालेल्या माहितीनुसार, केंद्रातील मंत्रिमंडळ विस्तारात शिवसेना आणि नव्याने राज्य सरकारमध्ये सामील झालेल्या अजित पवार गटाला एक-एक केंद्रीय मंत्रिपद दिले जाऊ शकते.

सूत्रांनी दिलेल्या माहितीनुसार, पुढच्या 3 दिवसात केंद्रीय मंत्रिमंडळाचा विस्तार होऊ शकतो. पावसाळी अधिवेशनापूर्वी मंत्रीमंडळ विस्तार करण्याचा केंद्रीय सरकारचा मानस असल्याचं बोललं जात आहे. यातच केंद्रातील काही मंत्र्यांना डच्चू मिळू शगकतो, असंही सूत्रांचं म्हणणं आहे. (Latest Marathi News)

याच आठवड्यात राज्य मंत्रिमंडळाचाही होऊ शकतो विस्तार?

दरम्यान, मागील आठवड्यात अजित पवार यांच्यासह ९ जणांनी मंत्रिपदाची शपथ घेतल्यानंतर आता या आठवड्यात पुन्हा राज्य मंत्रिमंडळाचा विस्तार होऊ शकतो. याबाबत काही दिवसांपूर्वी स्वतः मुख्यमंत्री एकनाथ शिंदे यांनी माहिती दिली होती. इच्छुकांना मंत्रिमंडळात स्थान मिळणार, असंही शिंदे म्हणाले होते.

माध्यमांशी संवाद साधताना मुख्यमंत्री एकनाथ शिंदे म्हणाले होते की, ''तातडीने मंत्रिमंडळ विस्तार होईल. यात इच्छुक आमदारांना संधी दिली जाईल.'' नेमका कधी होणार हा मंत्रिमंडळ विस्तार, असं त्यांना पत्रकारांनी विचारलं असता ते म्हणाले की, ''एक आठवड्याच्या आत मंत्रिमंडळ विस्तार होईल.''