सांगली : मुलांच्या खेळण्यातील बनावट नोटा (fake currency) घेऊन फसवणूक करणाऱ्यासाठी आलेल्या एका टोळीला मिरज (miraj) पोलिसांनी पकडले. या प्रकरणी महात्मा गांधी चौकी पोलिसांनी तिघांना अटक (arrest) केली असून त्यांच्याकडून साठ हजार रुपये राेख रक्कम आणि मनोरंजन नोटासह एकूण साडेतीन लाखांचा मुद्देमाल जप्त केला आहे. (sangli latest crime news)

मिरजेतील कृष्णाघाट येथे महात्मा गांधी चौक पोलिसांच्या नाकेबंदी दरम्यान एका गाडी तपासण्यात आली. ज्यामध्ये नोटांनी भरलेली बॅग आढळुन आली. या बॅगेत दाेन हजार ,पाचशे आणि शंभर रुपयांच्या नोटांचे असलेले बंडल तपासले असता वर आणि खाली खऱ्या नोटा आणि आतील बाजूस लहान मुलांच्या खेळण्यासाठी असणाऱ्या "भारतीय बच्चे बँक"च्या हुबेहूब खऱ्या नोटांप्रमाणे दिसणा-या नोटा पाेलीसांना आढळल्या.

यामध्ये पाचशे रुपयांचे 55 बंडल आणि दाेन हजार व शंभर रुपयांच्या 45 मनोरंजन नोटांच्या बंडलांचा समावेश होता. याप्रकरणी पोलिसांनी उस्मान खुदबुद्दीन एकसंबेकर (सोमवार पेठ कागल) , नदीम नालबंद (नदिवेस नाका, इचलकरंजी) आणि शब्बीर साहेब हुसेन पीरजादे (मिरज) या तिघांना ताब्यात घेऊन त्यांची पाेलीसांनी सखोल चौकशी केली.

या चाैकशीत त्यांनी खोट्या नोटा देऊन खऱ्या नोटा घेऊन फसवणूक करण्यासाठी मिरजेत आल्याचे सांगितले. या तिघांना अटक करण्यात आली असल्याची माहिती रविराज फडणीस (सहाय्यक पोलीस निरीक्षक, महात्मा गांधी चौकी, मिरज) यांनी दिली.

Edited By : Siddharth Latkar