महाराष्ट्र गृहनिर्माण व क्षेत्रविकास प्राधिकरणाच्या (म्हाडा) कोकण गृहनिर्माण व क्षेत्रविकास मंडळातर्फे ठाणे शहर व जिल्हा, तसेच वसई (जि. पालघर) येथील विविध गृहनिर्माण योजनांअंतर्गत एकूण ५,२८५ सदनिका आणि ओरोस (जि. सिंधुदुर्ग) व कुळगाव-बदलापूर येथील ७७ भूखंड विक्रीसाठी सोडत जाहीर करण्यात आली आहे. सदर सोडतीची अर्ज नोंदणी व अर्ज भरण्याची प्रक्रिया सोमवार, १४ जुलै २०२५ रोजी दुपारी १ वाजता 'गो-लाइव्ह' कार्यक्रमांतर्गत सुरू होणार आहे. या कार्यक्रमाचे उद्घाटन म्हाडाचे उपाध्यक्ष आणि मुख्य कार्यकारी अधिकारी संजिव जयस्वाल (भा.प्र.से.) यांच्या हस्ते होणार आहे.

सोडतीचे पाच घटक:

२०% सर्वसमावेशक योजना – ५६५ सदनिका

१५% एकात्मिक शहर गृहनिर्माण योजना – ३,००२ सदनिका

म्हाडा कोकण मंडळ गृहनिर्माण योजना (विखुरलेल्या सदनिका) – १,६७७ सदनिका

५०% परवडणाऱ्या घरांची योजना – ४१ सदनिका

७७ भूखंड – ओरोस व कुळगाव-बदलापूर येथे

अर्जाची अंतिम तारीख:

ऑनलाइन अर्ज: १३ ऑगस्ट २०२५, रात्री ११.५९ वाजेपर्यंत

अनामत रक्कम भरणा: १४ ऑगस्ट २०२५, रात्री ११.५९ वाजेपर्यंत

सर्व आवश्यक कागदपत्रे सादर करणाऱ्या अर्जदारांची पात्रता तपासली जाणार असून, प्रारूप यादी २१ ऑगस्ट २०२५ रोजी सायंकाळी ६ वाजता म्हाडाच्या अधिकृत संकेतस्थळावर प्रसिद्ध केली जाईल.

२५ ऑगस्ट २०२५ पर्यंत अर्जदारांना प्रारूप यादीवर दावा-हरकती नोंदवता येतील. १ सप्टेंबर २०२५ रोजी अंतिम पात्र अर्जांची यादी वेबसाईटवर प्रसिद्ध होईल.

संगणकीय सोडत:

३ सप्टेंबर २०२५ रोजी सकाळी १० वाजता, डॉ. काशीनाथ घाणेकर नाट्यगृह, ठाणे येथे संगणकीय सोडत जाहीर केली जाईल.

अर्जदारांना निकाल SMS, ई-मेल आणि ऍपद्वारे मिळेल.

सोडतीसाठी IHLMS 2.0 संगणकीय प्रणाली आणि मोबाईल ऍपचा वापर केला जाणार असून, अ‍ॅन्ड्रॉइड आणि iOS दोन्ही साठी उपलब्ध आहे.

अर्जदारांनी अर्ज भरण्यापूर्वी https://housing.mhada.gov.in या संकेतस्थळावर उपलब्ध मार्गदर्शक पुस्तिका, ध्वनीचित्रफीत, हेल्प फाईल्स आणि सहाय्यक माहितीचे अवलोकन करावे, असे आवाहन कोकण मंडळाच्या मुख्य अधिकारी श्रीमती रेवती गायकर यांनी केले आहे.