मस्साजोगचे दिवंगत सरपंच संतोष देशमुख यांची निर्घृण हत्या करण्यात आली. या हत्येमागील अनेक धागेदोरे आता समोर येत आहेत. या प्रकरणात आरोपींनी सुग्रीव कराड याचे नाव घेतल्यामुळे तपासाला नवी दिशा मिळण्याची शक्यता आहे. सुग्रीव कराडच्या सांगण्यावरून संतोष देशमुख आणि मस्साजोगच्या ग्रामस्थांनी सुदर्शन घुलेवर हल्ला केला होता, अशी माहिती आरोपींनी दिली होती. त्यामुळे सुग्रीव कराड नक्की कोण आहे? असा प्रश्न उपस्थित झाला आहे.

हत्येप्रकरणातील नव्या तपासाचा धागा

या हत्येप्रकरणी वाल्मिक कराडसह आठ आरोपींची चौकशी करण्यात आली. चौकशीदरम्यान, आरोपी जयराम चाटे आणि महेश केदार यांनी दिलेल्या जबाबात सुग्रीव कराड याचे नाव घेतले. त्यांच्या म्हणण्यानुसार, सुग्रीव कराडच्या सांगण्यावरूनच संतोष देशमुख आणि मस्साजोगच्या ग्रामस्थांनी सुदर्शन घुले यांच्यावर हल्ला केला होता. अशी माहिती आरोपींनी दिली.

सुग्रीव कराड नक्की कोण?

सुग्रीव कराड हा केज तालुक्याचा रहिवासी. तो एका राजकीय कुटुंबातील आहे. त्याची आई केज पंचायत समिती सदस्या होत्या, तर पत्नी नगरसेविका राहिल्या आहेत. मात्र, त्याची पार्श्वभूमी गुन्हेगारी असल्याचे बोलले जात आहे. तसेच त्याच्यावर अनेक गंभीर गुन्हे दाखल असल्याची माहिती समोर आली आहे.

धनंजय मुंडे आणि सुग्रीव कराड यांचे संबंध

सुग्रीव कराड हा माजी मंत्री धनंजय मुंडे आणि वाल्मिक कराड यांच्या गटासाठी काम करत होता. मात्र, मागील लोकसभा निवडणुकीत त्याची भूमिका संशयास्पद राहिल्याने धनंजय मुंडे यांनी त्याला बाजूला केले होते.

बजरंग सोनावणे यांच्याशी मतभेद

खासदार बजरंग सोनावणे हे विरोधी गटातील नेते आहेत. केज नगरपरिषद निवडणुकीत त्यांच्या मुलीविरोधात सुग्रीव कराड यांच्या पत्नीने निवडणूक लढवली होती. तसेच त्या निवडूनही आल्या होत्या.

एसआयटीला मदत

सूत्रांच्या माहितीनुसार, सुग्रीव कराडने आरोपींना पकडण्यासाठी एसआयटीला मदत केली होती. तसेच, संतोष देशमुख हत्या प्रकरणात डॉ. संभाजी वायभसे आणि त्यांच्या पत्नीला ताब्यात घेतल्यास महत्त्वाची माहिती देऊ, असाही सल्ला सुग्रीव कराडने एसआयटीला दिल्याची माहिती समोर आली आहे.