Marathwada News :

मराठवाड्यात  पावसाअभावी पिण्याच्या पाण्यासोबतच उन्हामुळे उभी पिकं माना टाकू लागली आहे. उद्योगांवर देखील जलसंकट येण्याची स्थिती निर्माण झाली आहे. आतापर्यंत पावसाळा कोरडेठाक गेल्यानं मराठवाड्यातील मोठ्या, मध्यम आणि लघु अशा 877 प्रकल्पातील पाणीसाठा वाढला नाही.

सध्या मागच्या वर्षांतील शिल्लक असलेलं पाणी शेती आणि पिण्यासाठी वापरले जात आहे. त्यामुळे केवळ 42 टक्केच उपयुक्त पाणीसाठा सध्या शिल्लक आहे. त्यामुळे पिण्याच्या पाण्यासोबतच उद्योगावर जलसंकट येणार असं चित्र आहे.  (Maharashtra News)

आता उर्वरित पावसाळ्याच्या काळात दमदार पाऊस झाला नाही, तर पुढच्या काळात पिण्याच्या पाण्यासह उद्योगांवर जलसंकट येण्याची स्थिती निर्माण झाली आहे. मागील वर्षी 86.87 टक्के जलसाठा होता. सर्वात मोठ्या जायकवाडी धरणात 34 टक्के पाणीसाठा आहे.

आजही संपूर्ण मराठवाड्यात उन्हाळ्यासारखं ऊन पडलं आहे. आकाश निरभ्र आहे. उन्हामुळे पिकं सुकत चालली आहे. पाऊस कधी पडेल ही चिंता शेतकऱ्यांना सतावत आहे. (Latest Marathi News)

यंदाच्या पावसाळ्यातले 78 दिवसांपैकी अर्धे दिवस कोरडे गेले आहेत. त्यामुळे तब्बल २२३ मिलीमीटर पावसाची तूट भरून निघणार कशी असा प्रश्न आहे. सोयाबीन, कापूस, बाजरी-मका या प्रमुख पिकांसोबत खरीपाच्या सर्व पिकांचा काळ अर्ध्यावर येऊन पोहचलाय. मात्र, पावसाअभावी वाढ खुंटली आहे.