दिल्लीत असलेले महाराष्ट्राचे मुख्यमंत्री देवेंद्र फडणवीस यांच्याविरोधात जेएनयूमध्ये आंदोलन करण्यात आलं. स्टुडंट फेडरेशन ऑफ इंडिया (SFI) या संघटनेच्या विद्यार्थ्यांनी हे आंदोलन केलं आहे. देवेंद्र फडणवीस, उपमुख्यमंत्री एकनाथ शिंदे गो बॅक अशा घोषणा विद्यार्थ्यांनी दिल्या. देवेंद्र फडणवीस हे विविध कार्यक्रमांनिमित्त दिल्लीत गेले आहेत. जेएनयूमध्ये होणाऱ्या कार्यक्रमासाठी ते उपस्थित राहणार होते. त्याच ठिकाणी फडणवीस यांच्याविरोधात एसएफआयच्या विद्यार्थ्यांनी आंदोलन सुरू केलं. फडणवीसांविरोधात जोरदार घोषणाबाजी करण्यात आली. फडणवीस, एकनाथ शिंदे गो बॅक अशा घोषणा देण्यात आल्या.

जेएनयुमध्ये मराठी अध्ययन केंद्राचे उद्धाटन करण्यात येत आहे. त्यावेळी विद्यार्थ्यांनी आंदोलन केलं. राज्यात आणण्यात आलेल्या जन सुरक्षा कायद्यावरून एसएफआयच्या विद्यार्थ्यांनी मुख्यमंत्री फडणवीसांविरोधात आंदोलन केले. संघाचा प्रपोगंडा चालणार नाही, असं म्हणत विद्यार्थ्यांनी फडणवीसांविरोधात आंदोलन केलं. महाराष्ट्रात दलित आणि मुस्लिमांवर हल्ले होत आहेत.त्यात तेथील सरकारने जन सुरक्षा बिल आणल्यानं जातीयवादाला प्रोत्साहन देण्याचं काम केलं जात आहे, त्याचा आम्ही विरोध करत असल्याची प्रतिक्रिया एका विद्यार्थीने दिलीय.

देवेंद्र फडणवीस आणि एकनाथ शिंदे तिरस्कार पसरवताय. त्यांच्या राजकारणामुळे तिरस्कार पसरतोय. त्यामुळे आम्ही निदर्शनं करत आहोत. जेएनयूसारख्या जागेत अशा लोकांना स्थान नाही. तिरस्कार पसरवणाऱ्या, समाजात विष कालवणाऱ्या लोकांना जेएनयूमध्ये स्थान नाही. असं आंदोलन करणाऱ्या विद्यार्थ्यांनी म्हटलंय.

कपडे बघून लोकांना ओळखा असं देवेंद्र फडणवीस सांगत असतील, भाजपचे लोक सांगत असतील हिंदी भाषा लादणार असतील तर आम्ही का गप्पा बसायचं? आम्हाला येथे मराठी अध्ययन केंद्र सुरू करण्याबाबत काही म्हणणं नाही. मात्र देवेंद्र फडणवीस यांच्या हस्ते ते उद्घाटन होतं आहे त्यावर आमचा आक्षेप आहे, असे जेएनयूमधील काही मराठी विद्यार्थ्य्यांनी म्हटलं.