मराठा आरक्षणासाठी मुंबईतील आझाद मैदानात उपोषणाला बसलेले मनोज जरांगे पाटील यांची खासदार सुप्रिया सुळे यांनी भेट घेतली. त्यावेळी काही मराठा आंदोलकांनी त्यांना घेराव घातला. आंदोलकांनी सुप्रिया सुळे यांची कार अडवली होती.

मराठा समाजाला ओबीसी प्रवर्गातून आरक्षणासाठी मनोज जरांगे पाटील आझाद मैदानावर उपोषणाला बसले आहेत. राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी मनोज जरांगे पाटील यांची आज, रविवारी भेट घेतली. त्यांच्या तब्येतची विचारपूस केली. तेथून निघताना कारच्या दिशेने जाताना मराठा आंदोलकांनी त्यांना घेराव घातला.

यावेळी मराठा आंदोलकांनी त्यांना काही प्रश्न विचारले. मराठा आंदोलकांनी त्यांची कार अडवत त्यांना घेराव घातला. मात्र सुरक्षा रक्षकांनी त्यांना गर्दीतून बाहेर काढलं. आंदोलकांनी त्यांना बराच वेळ अडवून ठेवलं.

खासदार सुप्रिया सुळे यांनी मनोज जरांगे पाटील यांची भेट घेतल्यानंतर त्यांच्या तब्येतची विचारपूस केली. उपोषणाला बसलेल्या जरांगे पाटील यांची प्रकृती बरी नाही. तरीही त्यांनी सुप्रिया सुळेंशी संवाद साधला. स्वच्छता, तसेच काही गैरसोयींबाबत मुंबई महापालिकेच्या आयुक्तांशी चर्चा करावी, असं जरांगे पाटील म्हणाले. जरांगेंशी चर्चा केल्यानंतर त्या उपोषणस्थळावरून निघत असताना काही आंदोलकांनी त्यांना रोखलं.

सर्वपक्षीय बैठक घ्या, एकदिवसीय अधिवेशन बोलवा

सुप्रिया सुळे यांनी मनोज जरांगे पाटील यांची भेट घेतल्यानंतर त्यांनी पत्रकारांशी संवाद साधला. आरक्षणासंदर्भात बोलताना सुप्रिया सुळे म्हणाल्या, मुख्यमंत्र्यांनी सर्वपक्षीय बैठक बोलवावी, त्यानंतर एकदिवशीय अधिवेशन घेत हा प्रश्न मार्गी लावावा. जर सरकारला करायचे असेल तर त्यांना अवघड नाहीये. कोणत्याच राजकीय पक्षाचा विरोध नाहीये. त्यामुळे मुख्यमंत्र्यांनी मंत्रिमंडळात निर्णय घ्यावा. त्यात गरज असेल तर कायद्यात बदल करावेत आणि आरक्षणाचा प्रश्न मार्गी लावा, असं सुप्रिया सुळे म्हणाल्या आहेत.