योगेश काशिद, साम टीव्ही, प्रतिनिधी

Beed Maratha Reservation : बीडच्या आहेर धानोरा येथे एक धक्कादायक घडली आहे. बीड तालुक्यात एका ३९ वर्षीय व्यक्तीने मराठा आरक्षण मिळत नसल्याची खदखद व्यक्त करत विषारी औषध प्राशन केले होते. या व्यक्तीचा मृत्यू झाल्याची माहिती समोर आली आहे. या घटनेमुळे परिसरात हळहळ व्यक्त केली जात आहे.

मिळालेल्या माहितीनुसार, मराठा आरक्षण मिळत नसल्याच्या उदासीनतेतून संतोष वळे यांनी आत्महत्या केल्याचे म्हटले जात आहे. बीडच्या आहेर धानोरा गावाचे संतोष वळे हे रहिवासी होते. मराठा आरक्षणाच्या मागणीसाठी करण्यात आलेल्या अनेक आंदोलनांमध्ये ते सहभागी झाले होते. आरक्षणाच्या मुद्यावरुन त्यांनी विषप्राशन केले होते.

मराठा आरक्षण मिळत नसल्याची संतोष यांना खदखद होती. यातून त्यांनी विषारी औषध प्राशन केले. 'आपल्याला मराठा आरक्षण मिळत नाही यामुळे येणारा काळ कठीण आहे', असे संतोष शाळेत शिकणाऱ्या त्यांच्या दोन्ही मुलांना वारंवार सांगत असायचे. ते सतत निराश असायचे असे त्यांच्या कुटुंबियांनी सांगितले आहे.

नैराश्यातून संतोष वळे यांनी २ सप्टेंबर रोजी विषारी औषध प्राशन केले. त्यानंतर त्यांना बीडमधील जिल्हा रुग्णालयात उपचारासाठी दाखल करण्यात आले. शुक्रवारी (१२ सप्टेंबर) संतोष वळे यांचा उपचारादरम्यान मृत्यू झाला. या घटनेमुळे गावात शोककळा पसरली आहे. संतोष यांच्या पश्चात पत्नी पल्लवी वळे, दोन लहान मुले, भाऊ, आई-वडील असा परिवार आहे.