मराठा आरक्षणावरुन मनोज जरांगे आणि सरकारमध्ये संघर्ष उडालेला असताना आता ओबीसी नेतेही आक्रमक झालेत. ओबीसी नेत्यांची मुंबईत METमध्ये बैठक झाली. मंत्री छगन भुजबळ, लक्ष्मण हाकेंसह अनेक ओबीसी नेते उपस्थित होते.नागपूरात राष्ट्रीय ओबीसी महासंघांच साखळी उपोषण सुरु आहे. त्यामुळे महासंघाचे अध्यक्ष बबनराव तायवाडे बैठकीला उपस्थित नव्हते. त्यामुळे भुजबळांनी त्यांच्याशी फोनवरुन चर्चा केली.

आंदोलनावर ठाम राहून मनोज जरांगेंनी सरकारला घाम फोडलाय. दुसरीकडे ओबीसी नेतेही आक्रमक झालेत. मराठवाड्यात ओबीसी प्रमाणपत्रांचं वाटप करण्याची मागणी मंत्रिमंडळ उपसमितीतील काही सदस्यांनी केल्याची माहिती आहे. मराठा आरक्षणासाठी मराठवाडा गॅझेटियर एक महत्त्वाचा ऐतिहासिक दस्तऐवज आहे.

गॅझेटियरमध्ये मराठवाड्यातील मराठ्यांचा 'कुणबी', असा उल्लेख आहे. याशिवाय मराठा समाजाचा शैक्षणिक, आर्थिक आणि सामाजिक दर्जा अत्यंत मागासलेला होता असाही उल्लेख आहे. या आधारे उपसमितीतील काही सदस्यांनी मराठवाड्यात ओबीसी प्रमाणपत्रांचं वाटप करण्याची मागणी केलीय.

दुसरीकडे जालन्यातील अंतरवाली सराटीमधील सोनिया नगरमध्ये ओबीसींच्या धरणे आंदोलनाला सुरुवात झालीय. ओबीसी आंदोलक बाळासाहेब बटुळे, बाळासाहेब दखने, विठ्ठल तळेकर, श्रीहरी निर्मल यांनी ओबीसी आरक्षण बचाव धरणे आंदोलनाला सुरुवात केली आहे. एकीकडे मनोज जरांगे मराठा आरक्षणाच्या मागणीसाठी मुंबई येथे आमरण उपोषण करत आहे तर त्यांच्या मागण्यांना विरोध करत ओबीसी बांधव आंतरवाली सराटी येथे धरणे आंदोलन करत आहे.