योगेश काशिद, साम टीव्ही

बीड: मराठांच्या ११ मुलींचा विवाह ओबीसींसोबत लावा, असं वक्तव्य लक्ष्मण हाके यांनी केल्याने मराठा समाज आक्रमक झाला आहे. लक्ष्मण हाके यांच्या वक्तव्याचा निषेध मराठा समाजातून केला जात आहे. लक्ष्मण हाके यांच्या वक्तव्याचा समाचार मनोज जरांगे यांच्या सहकाऱ्यांनीही घेतला. लक्ष्मण हाके यांना जिथे दिसेल तिथे ठोकू, असा शब्दात मनोज जरांगे यांचे सहकारी गंगाधर काळकुटे यांनी इशारा दिला आहे.

मराठा समाजाच्या आरक्षणाविषयक जीआरमुळे ओबीसी समाजाने आंदोलनाचा पवित्रा घेतला आहे. ओबीसी नेते लक्ष्मण हाके यांच्या नेतृत्वात राज्यातील विविध ठिकाणी आंदोलने सुरु आहेत. याच आंदोलनादरम्यान लक्ष्मण हाके यांनी मराठा समाजाला विवाहाचा प्रस्ताव दिला. याच प्रस्तावावरून मराठा समाजातील आंदोलकांकडून लक्ष्मण हाके यांना लक्ष्य केलं जात आहे. गंगाधर काळकुटे यांनी म्हटलं की, 'हाके यांनी काय मॅरेज ब्युरो सुरू केला आहे का? असे काही वादग्रस्त वक्तव्य करण्यापेक्षा आत्मपरीक्षण करावं'.

'हाके यांनी अभ्यास करावा. आरक्षण मिळलं. ओबीसीत आरक्षण भेटले म्हणजे लगेच आंतरजातीय विवाह करावा, असं कुठे काही लिहिलेलं नाही. ओबीसीमध्ये साडेतीनशे जाती आहेत. त्यांच्यामध्ये आणखी काही आंतरजातीय विवाह झालेले नाहीत, पण त्यांच्यामध्ये जर आंतरजातीय विवाह होत असतील, तर आम्ही देखील करायला तयार आहोत. लक्ष्मण हाके यांनी वादग्रस्त प्रश्न उपस्थित करू नयेत. लक्ष्मण हाके दिसतील, तिथे ठोकू. रस्त्यावर टोकाचा संघर्ष होईल. लक्ष्मण हाके यांनी मराठा समाजाबद्दल खालच्या भाषेत बोलू नये, असं गंगाधर काळकुटे यांनी म्हटलं आहे.

'लक्ष्मण हाके यांनी म्हटलंय की, त्यांच्यावर जात चोरण्याची वेळ आली आहे. यावर काळकुटे म्हणाले की, मराठा समाजाची ही आरक्षणाची लढाई आहे. ओबीसीमधील 50% च्या आतमधील जे आमच्या हक्कांचं आरक्षण आहे. 1994 साली शरद पवारांनी मराठा समाजासह येथे जातींना आरक्षण लागू केले हे आम्ही मिळवलं आहे. आमचं आरक्षण आम्हाला मिळावं म्हणून आमचा हा लढा आहे. आम्ही कुठेही जात चोरीचा प्रयत्न केलेला नाही. त्यामुळे लक्ष्मण हाके यांनी थोडं तोंड सांभाळून बोलावं,असे ते पुढे म्हणाले.

पंकजा मुंडे यांच्या मागणीवर बोलताना काळकुटे म्हणाले, 'चुकीच्या नोंदणी निघत असेल तर चौकशी करा. मात्र आम्हाला पंकजा मुंडे यांना सांगायचं आहे की, मराठे तर ओबीसीमध्ये आलेच आहेत. सरकार तुमचं आहे. चौकशी करा. अधिकारी बोगस प्रमाणपत्र देणार नाहीत. मराठा समाजाबद्दल वेळोवेळी पंकजा मुंडे या वेगळी भूमिका घेत आहेत. त्यांनी भूमिकेमध्ये बदल केला पाहिजे. मराठा समाजाला ओबीसीतून आरक्षण मिळत असताना त्यांनी विरोध करूनही त्या आमच्या जिल्ह्याच्या नेत्या आहेत, असेही काळकुटे म्हणाले.