Manoj Jarange Patil News:

>> विनोद पाटील, साम टीव्ही प्रतिनिधी

लोकसभा निवडणुकीनंतर पुन्हा मराठा आरक्षणाचा मुद्दा पेटणार आहे. कारण मनोज जरांगे थेट विधानसभेच्या तयारीला लागणार आहेत. आरक्षण न मिळाल्यास विधानसभेत तातदीनं मैदानात उतरणार असल्याचा निर्धार जरांगेंनी केलाय. जरांगेंनी काय रणनीती आखलीय याचबद्दल अधिक माहिती जाणून घेऊ...

मनोज जरांगे पाटील काय म्हणाले?

मनोज जरांगे पाटील म्हणाले आहेत की, सगे सोयऱ्यांच्या कायद्याची अंमलबजावणी केली नाही तर मराठा समाजाला घेऊन विधानसभेला 100 टक्के पूर्ण ताकदीने उतरणार.

लोकसभा निवडणुकीमुळे कुणबी प्रमाणपत्राचा जीआर रखडला. त्यामुळे नाराज झालेल्या जरांगेंनी लोकसभा निवडणुकीत प्रत्येक मतदारसंघातून 500 उमेदवार उभे करण्याची खेळी केली. त्यामुळे प्रशासनाला चांगलाच घाम फुटला होता. मात्र जरांगेंनी एक पाऊल मागे घेत आपली तलवार म्यान केली.

मात्र आरक्षणाच्या विरोधात भूमिका घेणाऱ्यांना पाडा, असं आवाहन करून जरांगे पाटील यांनी अनेक उमेदवारांचं टेन्शन वाढवलंय. तर आताही सगे सोयऱ्यांच्या अधिसूचनेची अंमलबजावणी झाली नाही तर नाव घेऊन त्यांना पाडणार असा निर्वाणीला इशारा जरांगेंनी दिलाय.

मनोज जरांगे पाटील यांनी लोकांचे हाल होतील म्हणून नारायण गडावर 900 एकरवरील सभा रद्द केली. मात्र आरक्षण न दिल्यास विधानसभेत पूर्ण ताकदीने उतरणार असल्याचं जाहीर केलंय. यामुळे सरकारची डोकेदुखी तर वाढणार आहे. पण राज्यातली राजकीय समीकरणंही बदलण्याची शक्यता आहे.