योगेश काशिद, बीड

मराठा आंदोलक मनोज जरांगे पाटील (Manoj Jarange Patil) यांची प्रकृती बिघडली असून रुग्णालयात त्यांच्यावर उपचार सुरू आहेत. डॉक्टरांच्या निगराणीखाली त्यांच्यावर उपचार सुरू आहेत. बीडमध्ये झालेल्या मेळाव्या दरम्यान भाषण करत असताना अचानक मनोज जरांगेंची प्रकृती खालावली. त्यानंतर त्यांना तात्काळ खासगी रुग्णालयात दाखल करण्यात आले आहे. (Manoj Jarange Patil Health Update)

रुग्णालयात दाखल केल्यानंतर डॉक्टरांनी मनोज जरांगे पाटील यांच्या तपासण्या केल्या. यावेळी रक्ताचे देखील नमुने घेण्यात आले आहे. सध्या त्यांची प्रकृती स्थिर असली तरी २४ तासांसाठी त्यांना बीडच्या रुग्णालयात डॉक्टरांच्या निगराणीखाली ठेवले जाणार आहे. प्रकृती साथ देत नसल्याचे जरांगे पाटील यांनी भाषणात सांगितले होते. (Beed News In Marathi)

शुक्रवारी बीडमध्ये मेळाव्याचे आयोजन करण्यात आले होते. या मेळाव्यामध्ये मनोज जरांगे पाटील भाषण देत होते. त्यावेळी त्यांना अचानक चक्कर येऊ लागली. सुरूवातीला त्यांनी दुर्लक्ष केले आणि भाषण सुरूच ठेवले. चक्कर येत असल्याने ते खाली बसून भाषण देऊ लागले. पण नंतर त्यांना जास्त त्रास होऊ लागला आणि त्यांना तात्काळ नजीकच्या रुग्णालयात उपचारासाठी दाखल करण्यात आले. सध्या त्यांच्यावर डॉक्टरांच्या निगराणीखाली उपचार सुरू आहेत.