अक्षय शिंदे, साम टीव्ही

बीडमध्ये ओबीसी समाजाचा जंगी मेळावा पार पडला. या मेळाव्यात ओबीसी नेत्यांनी मराठा आरक्षणाचे आंदोलक मनोज जरांगे यांच्यावर जोरदार टीका केली. धनंजय मुंडे ते छगन भुजबळ यांनी मराठा आरक्षण जीआरवरून मनोज जरांगेंवर तोफ डागली. धनंजय मुंडे यांनी मराठा समाजाला ओबीसीतून आरक्षण देण्याच्या मागणीचाही समाचार घेतला. त्यांनी मनोज जरांगे यांच्यावरही कठोर भाष्य केलं. मुंडे यांच्या टीकेनंतर मनोज जरांगे यांनी थेट आव्हान दिलं आहे.

ओबीसी मेळावा झाल्यानंतर मनोज जरांगे पाटील यांनी माध्यमांशी संवाद साधला. यावेळी धनंजय मुंडे यांच्यावर टीका करताना मनोज जरांगे म्हणाले, 'संपलेल्यावर बोलू नये. आम्ही सुद्धा बसू. तेव्हा भूमिका मांडू. मी मुख्यमंत्री यांच्या आईवर बोललो नाही. तू पंतप्रधानांच्या आईवर काय बोलला होता, ते काढून दाखवू का? त्याची जुनी रेकॉर्डिंग आहे'.

'फडणवीस त्यांना विसरले का? तू माझ्या नादाला लागू नको. तुमच्यावर बोललो आहे. मी तुमच्या घराण्यावर नाही. तुम्ही मराठ्यांचे खून करता म्हणून तुमच्यावर बोललो आहे. याचीच बायको माझ्याकडे साथ द्या म्हणायला आली होती. 4 दिवस झाले, त्या येऊन गेल्या, पण कौटुंबीक प्रकरण असल्याने मी हस्तक्षेप करण्यास नकार दिला. बाईच्या आडून मी वार करत नाही, असेही ते म्हणाले.

विजय वडेट्टीवार यांच्यावर भाष्य करताना जरांगे म्हणाले,वडेट्टीवार यांनी पहिल्या भूमिकेवर यावे. भुजबळ राजकीय स्वार्थासाठी त्यांचा वापर करत आहे. धनंजय मंडेंना माहीत नाही, भुजबळ कधी गेम करून जाईल. भुजबळांना माहीत आहे की ते संपल्यात जमा आहे. त्यामुळे ओबीसींचं नेतृत्व धनगर समाजाकडे जाण्याची शक्यता आहे. गृहमंत्रालयाने भुजबळ यांचा जामीन रद्द करावा. आमच्यात दहशत पसरवत आहे,असे भुजबळ पुढे म्हणाले.