अजय सोनवणे

मनमाड (नाशिक) : नेहमी वरदड असलेल्‍या रेल्‍वे स्‍थानकावर माथेफिरूने रेल्‍वे येताच उडी मारली. अचानक घडलेल्‍या या प्रकाराने (Railway) रेल्‍वे स्‍थानकावर उभ्‍या असलेल्‍या नागरीकांच्‍या काळजाचा ठोका चुकला होता. या सर्व गोंधलात (Manmad) ट्रेन सुमारे अर्धा तास लेट झाली. (Maharashtra News)

मनमाड रेल्वे स्थानकात दुपारच्या सुमारास ही घटना घडली आहे. रेल्‍वे स्‍थानकावर एक माथेफिरु रेल्वे प्लॅटर्फॉमवरील पत्र्याच्या शेडवर चढला. हा प्रकार काहींच्‍या लक्षात आल्‍यानंतर स्‍थानकावरील नागरीकांनी आरडाओरड केली. दरम्‍यान रेल्‍वे पोलिसांनी त्याला खाली उतरविण्याचा प्रयत्न केला. परंतु, तो काही केल्‍या खाली उतरत नव्‍हता.

वायरवर पडल्‍याने झाला स्‍फोट

माथेफिरूला खाली उतरविण्याचा प्रयत्‍न सुरु असतांना प्लॅटफॉर्म नंबर दोनवर नवी दिल्ली- कर्नाटक एक्सप्रेस गाडी आली. याच दरम्‍यान माथेफिरुने गाडीवर उडी मारली. मात्र तो ओव्हरहेड वायरवर पडल्याने स्फोट होऊन गाडीच्या टपावर पडून गंभीर जखमी झाला. त्‍याला तातडीने रेल्वे पोलिस, आरपीएफ यांनी त्याला खाली उतरवत उपचारासाठी नाशिक येथे हलविले.