संजय राठोड, साम टीव्ही

आगामी स्थानिक स्वराज्य संस्थाच्या निवडणुकीच्या पार्श्वभूमीवर सत्ताधारी पक्षांनी महाराष्ट्र पिंजून काढायला सुरुवात केली आहे. महायुतीतील घटक पक्षांनी राज्यभरातील विविध भागात मोर्चेबांधणी सुरु केली आहे. यवतमाळमध्येही महायुतीतील भाजपने जोरदार मोर्चेबांधणी सुरु केली आहे. याच यवतमाळमध्ये भाजपने काँग्रेसला मोठा धक्का दिला आहे. काँग्रेसचा बडा नेता भाजपचा वाटेवर असल्याने जिल्ह्यातील राजकीय समीकरण बदलण्याची शक्यता व्यक्त केली जात आहे.

काँग्रेसचे यवतमाळ जिल्हा परिषदेचे माजी शिक्षण सभापती तथा प्रदेश काँग्रेसचे माजी सरचिटणीस देवानंद पवार भाजपच्या वाटेवर आहेत. भाजप प्रवेशाबाबत देवानंद पवार यांनी भूमिका स्पष्ट केली आहे. देवानंद पवार यांनी काँग्रेस नेतृत्वासह राज्य आणि राष्ट्रीय नेतृत्वावर तोफ डागली.

त्याचवेळी त्यांनी काँग्रेस सोडल्याचेही जाहीर केले. देवानंद पवार यांनी काँग्रेसची साथ सोडल्याने जिल्ह्यात राजकीय भूकंप होण्याची स्पष्ट चिन्हे आहेत. तर या राजकीय भूकंपाला काँग्रेसमधील अंतर्गत दुफळी कारणीभूत ठरण्याची शक्यता वर्तवली जात आहे.

नंदूरबारमध्ये काँग्रेसला धक्का

नंदूरबारच्या अक्कलकुवा तालुक्यात काँग्रेसच्या पदाधिकाऱ्यांनी पक्षाला रामराम ठोकत शिंदे गटात प्रवेश केला. ग्रामपंचायत सदस्यांसह काँग्रेस प्रमुख पदाधिकाऱ्यांनी पक्षाची साथ सोडली आहे. यामुळे काँग्रेसला नंदूरबारमध्ये मोठा धक्का बसलाय.

नंदूरबारमधील काँग्रेसची साथ सोडून काही पदाधिकाऱ्यांनी शिंदे गटाला साथ दिली. यामुळे यवतमाळच्या अक्कलकुवामध्ये शिंदे गटाची ताकद वाढणार असल्याचं बोललं जात आहे.

नंदूरबारमधील दहेल आणि खोडीमधील ५ ग्रामपंचायत सदस्यांसह काँग्रेसच्या पदाधिकाऱ्यांनी शिवसेनेत प्रवेश केला. अक्कलकुवा-अक्राणी विधानसभेचे आमदार आमश्या पाडवी यांच्या प्रमुख उपस्थितीत त्यांनी पक्षप्रवेश केला. यामुळे अक्कलकुवामध्ये शिंदे गटाची ताकद वाढणार असल्याचं बोललं जात आहे.