छत्रपती संभाजीनगर, ता. २६ सप्टेंबर

Mahayuti Seat Sharing Formula: राज्यात विधानसभा निवडणुकांची जोरदार मोर्चेबांधणी सुरु असून जागा वाटपाच्या चर्चांना वेग आला आहे. आगामी निवडणुकांची तयारी, जागा वाटपाचा फॉर्म्युला तसेच रणनिती ठरवण्यासाठी केंद्रीय गृहमंत्री अमित शहा सध्या महाराष्ट्र दौऱ्यावर आहेत. अमित शहा यांच्या या दौऱ्यावेळी महायुतीच्या जागा वाटपासंदर्भात चर्चा झाली. या चर्चेमध्ये भारतीय जनता पक्षाने १५० जागा लढवाव्या आणि शिवसेना शिंदे गट, अजित पवार गटाने राहिलेल्या जागा वाटून घ्याव्या, असा नवा फॉर्म्युला तयार झाल्याचे विश्वसनीय सुत्रांनी सांगितले आहे.

याबाबत सविस्तर माहिती अशी की, केंद्रीय गृहमंत्री अमित शहा यांच्या महाराष्ट्र दौऱ्यावेळी छत्रपती संभाजीनगरमध्ये महत्वाची बैठक पार पडली. छत्रपती संभाजी नगर शहरातील हॉटेल रामामध्ये झालेल्या या बैठकीला केंद्रीय गृहमंत्री अमित शहा मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, प्रफुल पटेल आदी महत्वाचे नेते उपस्थित होते. या बैठकीत आगामी निवडणूक आणि जागा वाटपाचा फॉर्मुल्यावर चर्चा झाल्याचे सांगण्यात येत आहे.

सुत्रांनी दिलेल्या माहितीनुसार, विधानसभेला भारतीय जनता पक्षाने १५५ ते १६० जागा लढवाव्या आणि राहिलेल्या जागा शिंदे गट तसेच अजित पवारांच्या राष्ट्रवादीने घ्याव्यात, असे अमित शहांनी सांगितल्याची माहिती समोर आली आहे. तसेच भाजप कोणत्याही परिस्थितीत १५० पेक्षा कमी जागा लढणार असंही अमित शहांनी स्पष्ट केल्याचे सुत्रांनी सांगितले आहे. भाजपने १५५ ते १६० जागा लढवल्यास शिवसेना शिंदे गटाने ८० ते ८५ जागा लढवाव्या तर राष्ट्रवादी अजित पवार गटाला ५५ ते ६० जागा देण्यात याव्या, असा फॉर्म्युला या बैठकीत मांडला गेल्याची माहिती सूत्रांनी दिली आहे.

दरम्यान, भाजपने १५० ते १६० जागा लढवल्यानंतर राहिलेल्या जागा वाटप करताना एकनाथ शिंदे, अजित पवारांनी देवेंद्र फडणवीसांशी चर्चा करुन निर्णय घ्यावा, असंही शहांनी सुचवल्याचे सांगण्यात येत आहे. थोडक्यात भाजप १५० पेक्षा कमी जागा लढवणार नाही, असा निर्णय या बैठकीत झाल्याचे स्पष्ट होत आहे.