महायुतीत एकनाथ शिंदे आणि शिंदे सेनेच्या मंत्र्यांची नाराजी लपून राहिली नाही. फोडाफीडीच्या राजकारणावरुन नाराज झालेल्या शिंदेंनी भाजपचे प्रदेशाध्यक्ष रवींद्र चव्हाणांची थेट दिल्लीत पक्षश्रेष्ठींकडे तक्रार केल्याची माहिती आहे. याचे पडसाद आता निवडणुकीच्या प्रचारातही दिसतायेत. निवडणुकीच्या रिंगणात एकमेकांसमोर उभे ठाकलेले भाजप आणि शिंदे सेनेचे नेते एकमेकांवर तिखट टिका करतायेत.

या पार्श्वभूमीवर 2 डिंसेबरपर्यंत युती टिकवायची आहे, असं विधान रवींद्र चव्हाणांनी केलंय. विटा नगरपरिषदेच्या प्रचारात तर चव्हाणांनी 'एक नंबर एक नंबरच असतो' असं म्हणत शिंदेंना पुन्हा चिमटा काढलाय. नगरपालिका निवडणुकीत महायुतीतील मित्रपक्ष आमनेसामने आल्यानं टीकेचा धुरळा उडलाय. चव्हाणांआधी मंचरमधील सभेत एकनाथ शिंदेंनी "ज्याच्या मागे महिला त्याचा मतपेटीत नंबर पहिला" अशी घोषणाबाजी करत विरोधकांना ललकारलं होतं.

दुसरीकडे या वादात निलेश राणेंनी उडी घेत. एकनाथ शिंदे जे बोलतात, ते फायनल, असं त्यांनी चव्हाणांना टोला लगावलाय. ठाणे, सिंधुदुर्ग आणि हिंगोली जिल्ह्यात तर भाजप आणि शिंदेसेनेतला वाद टोकाला गेलाय. आता प्रचाराच्या तोफा थंडावल्यावर महायुतीत काय घडणार? आगामी जिल्हा परीषद आणि महापालिका निवडणुकीत मित्र पक्षांची भूमिका काय असणार ? याकडे राज्याचं लक्ष आहे.